हिमाल प्रेस 
अनशनरत बिनु।
काठमाडौँ- न्यायका लागि भन्दै आमरण अनशन बसिरहेकी बिनु यादव र प्रदीप कठायतबीचको सम्बन्धविच्छेदलाई उच्च अदालत पाटनले उल्ट्याइदिएको छ। मंगलबार न्यायाधीश सुवास पौडेल र सुदर्शनराज पाण्डेको संयुक्त इजलासले उनीहरूबीचको वैवाहिक सम्बन्ध कायमै राख्ने फैसला गरेको हो।
२०७९ वैशाखमा जिल्ला अदालत रामेछापका न्यायाधीश बद्रीप्रसाद ओलीको एकल इजलासले बिनु र प्रदीपबीच सम्बन्धविच्छेदको फैसला गरेको थियो।
बिनुले २०७९ असारमा जिल्ला अदालतको फैसला मान्य नभएको भन्दै उच्च अदालतमा मुद्दा दर्ता गरेकी थिइन्। बिनुका अनुसार प्रदीपसँग जर्बजस्ती सम्बन्धविच्छेद गराइएको थियो।
बिनु र प्रदीपले २०७७ जेठमा विवाह दर्ता गरेका थिए। अहिले बिनु विगत १५ दिनदेखि आमरण अनशनमा छिन्। बलात्कार र घरेलु हिंसाबाट पीडित भएकाले दोषीमाथि कडा कारबाही हुनुपर्ने ६ बुँदे माग राखी उनी काठमाडौँको माइतीघरमा अनशन बसिरहेकी छन्।
पीडक भनिएकाहरूले आफूलाई सहयोग गर्ने अभियन्तालाई समेत अनशनमै आएर ज्यान मार्ने धम्की दिइरहेको बिनुले आरोप लगाएकी छन्।
