हिमाल प्रेस 
काठमाडौँ- भारत मुम्बईको वान्खेडे स्टेडियम। इंगल्याण्ड र नेपालबीचको खेल। कसले जित्छ सहजै अनुमान लगाइयो- इंगल्याण्ड।
क्रिकेटको ‘पावरहाउस’ भएकाले पनि इंगल्याण्डले नेपाललाई सहजै जित्छ भन्ने आकलन गरिएका थिए। विभिन्न अनुमानहरूले पनि इंगल्याण्डले जित्ने सम्भावना प्रतिशत ठूलै राखिएका थिए।
तर आइतबार एउटा यस्तो दृश्य देखियो, जसले विश्व क्रिकेटको शक्ति सन्तुलन फेरिन थालेको संकेत गर्यो। आईसीसी पुरुष टी-२० विश्वकप २०२६ अन्तर्गत समूह ‘सी’को पाँचौँ खेलमा नेपालले विश्व क्रिकेटको महारथि इंगल्याण्डलाई अन्तिम बलसम्म जसरी स्तब्ध बनायो, त्यसले क्रिकेट जगतमा नेपालको उपस्थितिलाई नयाँ परिभाषा दिएको छ। इंगल्याण्ड ४ रनले विजयी भए पनि मैदानभित्रको संघर्ष र दर्शकदीर्घाको समर्थनमा नेपाल कतै कम देखिएन।
यस खेलले नेपाली खेलाडीहरूको व्यक्तिगत क्षमतालाई मात्र उजागर गरेन, बरु विश्वस्तरका कीर्तिमानहरूको सूचीमा नेपाली नामहरूलाई पनि गर्वका साथ अंकित गरिदियो।
टस जितेर ब्याटिङ रोजेको इंगल्याण्डले २० ओभरमा ७ विकेट गुमाएर १८४ रन बनाउँदा नेपाली बलिङमा एउटा यस्तो सुरुवात भयो जुन विरलै देख्न पाइन्छ।
नेपालका युवा स्पिनर शेर मल्लले आफ्नो अन्तर्राष्ट्रिय टी-२० करियरको पहिलो बलमै इंगल्याण्डका आक्रामक ओपनर फिल साल्टलाई क्लिन बोल्ड गर्दै विश्व कीर्तिमानको नजिक पुगे।
करियरको पहिलो बलमै विकेट लिने विरलै बलरहरूको सूचीमा मल्लको नाम दर्ता हुनु नेपालका लागि एउटा ऐतिहासिक क्षण थियो। यसका साथै अनुभवी स्पिनर सन्दीप लामिछानेले यसै खेलमार्फत टी-२० अन्तर्राष्ट्रियमा आफ्नो विकेट संख्यालाई नयाँ उचाइमा पुर्याउँदै सबैभन्दा चाँडो महत्त्वपूर्ण विकेट लिने तालिकामा आफ्नो स्थान अझ सुदृढ बनाए।
नन्दन यादवले जोस बटलर र ह्यारी ब्रुक जस्ता दिग्गजहरूलाई पवेलियन फर्काउँदा उनको बलिङ औसत र इकोनोमी रेटले विश्वका उत्कृष्ट बलरहरूलाई समेत चुनौती दिइरहेको थियो।
ब्याटिङतर्फ नेपालले देखाएको प्रदर्शन त अझ विष्फोटक र कीर्तिमानी रह्यो। लक्ष्य पछ्याउने क्रममा नेपाली टोलीका मेरुदण्ड दीपेन्द्र सिंह ऐरीले ऐतिहासिक कोशेढुंगा पार गरे। उनी टी-२० अन्तर्राष्ट्रिय क्रिकेटमा २ हजार रन पूरा गर्ने पहिलो नेपाली खेलाडी बनेका छन्।
यो कीर्तिमान उनले केवल ४४ रनको इनिङ्स खेल्ने क्रममा बनाएका हुन्, जसले उनलाई विश्वका सीमित उत्कृष्ट अलराउन्डरहरूको सूचीमा उभ्याएको छ। दीपेन्द्रले यसै खेलमा २ विकेट समेत लिएर टी(२० आईमा २ हजार रन र ५० भन्दा बढी विकेट लिने विश्वकै दुर्लभ खेलाडीहरूको सूचीमा आफ्नो नाम लेख्न सफल भए। उनको यो उपलब्धिले नेपाली क्रिकेटको प्राविधिक विकास र स्थिरतालाई विश्वसामु प्रमाणित गरिदिएको छ।
खेलको उत्तरार्धमा लोकेश बमले देखाएको आक्रामकता अर्को एउटा रेकर्डको नजिक थियो। उनले मात्र २० बलमा ३९ रन बनाउने क्रममा जोफ्रा आर्चर जस्ता विश्वका तीव्र गतिका बलरलाई प्रहार गरेका छक्काहरूले वान्खेडेको इतिहासमै कुनै पनि एसोसिएट राष्ट्रका ब्याटरले टेस्ट राष्ट्र विरुद्ध गरेको उत्कृष्ट प्रहारहरूमध्ये एक मानिएको छ।
नेपालले निर्धारित २० ओभरमा ६ विकेट गुमाएर १८० रन जोड्यो, जुन कुनै पनि आईसीसी फुल मेम्बर राष्ट्र विरुद्ध नेपालले बनाएको अहिलेसम्मकै उच्च योगफल हो। १८५ रनको विशाल लक्ष्य पछ्याउँदा १८० रनसम्म पुग्नु र अन्तिम बलमा मात्र ५ रनको आवश्यकता रहनुले नेपाली ब्याटिङ अब विश्वको जुनसुकै बलिङ आक्रमणविरुद्ध टिक्न र रन बनाउन सक्षम छ भन्ने देखाउँछ।
यो खेल केवल तथ्यांक र रेकर्डमा मात्र सीमित रहेन। वान्खेडेको रातो माटोमा नेपाली बलर र ब्याटरले विश्वविजेता इंगल्याण्डको पसिना छुटाइदिए। कुनै समय नेपाल जस्ता टोलीहरू विरुद्ध २०० वा २५० रनको अपेक्षा गर्ने क्रिकेट पण्डितहरू आज नेपालको बलिङ कसिलो भएको र ब्याटिङमा गहिराइ आएको विश्लेषण गर्न बाध्य भएका छन्।
हारको पीडा लोकेश बमका आँखामा झल्किए पनि र दीपेन्द्र सिंह ऐरीको अर्धशतक चुक्दा समर्थकमा निराशा छाए पनि, नेपालले क्रिकेटको ‘पावरहाउस’ लाई अन्तिम ओभरको अन्तिम बलसम्म रक्षात्मक अवस्थामा पुर्याउनु नै यस विश्वकपको अहिलेसम्मकै सबैभन्दा ठूलो उपलब्धि हो।
समग्रमा नेपालले इंगल्याण्डविरुद्धको यो खेलबाट एउटा सन्देश स्पष्ट रूपमा दिएको छ- नेपाल अब ‘अन्डरडग’ मात्र होइन, बरू जुनसुकै बेला ठूला टोलीको साम्राज्य ढलाउन सक्ने ‘जायन्ट किलर’का रूपमा उदाएको छ।
