हिमाल प्रेस 
काठमाडौँ- नेपाल टेलिकमले एनटी फाइबरमार्फत उपलब्ध गराउँदै आएको एनटीटीभी सेवाका लागि भर्चुअल सेट-टप बक्स सञ्चालनमा ल्याएको छ।
कम्पनीले बिहीबारदेखि एन्ड्रोइड टेलिभिजनमा प्रयोग गर्न मिल्ने भर्चुअल सेट-टप बक्स उपलब्ध गराएको हो। यससँगै स्मार्ट टेलिभिजन प्रयोगकर्ताले छुट्टै भौतिक सेट-टप बक्सबिना एनटीटीभी सेवा प्रयोग गर्न सक्नेछन्।
टेलिकमद्वारा जारी विज्ञप्तिअनुसार ग्राहकले आफ्नो एन्ड्रोइडमा आधारित स्मार्ट टेलिभिजनमा गुगलप्ले स्टोरमार्फत ‘स्मार्ट एनटीटीभी’ खोजी गरी सेवा प्रयोग गर्न सक्नेछन्। कम्पनीले आगामी दिनमा अन्य स्मार्ट टेलिभिजनमा पनि प्रयोग गर्न मिल्ने गरी सेवा विस्तार गर्ने जनाएको छ।
नयाँ सेवाग्राहीले भर्चुअल सेट-टप बक्ससहितको योजना लिएमा एक हजार रुपैयाँ छुट पाउने व्यवस्था गरिएको कम्पनीले जनाएको छ।
नेपाल टेलिकमले एनटी फाइबरमार्फत एउटै तारबाट टेलिफोन, उच्च गतिको इन्टरनेट र टेलिभिजन सेवा उपलब्ध गराउँदै आएको छ। कम्पनीले भर्चुअल सेट-टप बक्ससहित विभिन्न टेलिभिजन प्याकेज पनि उपलब्ध गराएको जनाएको छ।
