हिमाल प्रेस 
काठमाडौँ- पूर्वप्रधानमन्त्री डा.बाबुराम भट्टराईले नर्सहरूको श्रम, पारिश्रमिक र सेवासुविधाको अवस्थाप्रति गम्भीर ध्यानाकर्षण गराउँदै उनीहरूको समस्या तत्काल न्यायपूर्ण ढंगले समाधान गर्न सरकारसँग आग्रह गरेका छन्।
सामाजिक सञ्जालमार्फत उनले नर्सिङ सेवालाई कृत्रिम बुद्धिमत्ता (एआई) ले समेत विस्थापित गर्न नसक्ने र भविष्यमा झन् बढी आवश्यक मानवीय सेवाका रूपमा विश्वभर चर्चा भइरहेको उल्लेख गरेका छन्।
तर नेपालमा भने नर्सहरू अत्यन्त न्यून पारिश्रमिक र सीमित सेवासुविधामा अहोरात्र खटिन बाध्य भएको भन्दै उनीहरू सबैभन्दा पीडित श्रमिकमध्येका एक बनेको भट्टराईको भनाइ छ।
उनले आफू पटकपटक अस्पतालमा भर्ना हुँदा नर्सहरूमाथि भइरहेको अन्याय र विभेदको कारुणिक अवस्था प्रत्यक्ष देखेको पनि बताएका छन्।
पूर्वप्रधानमन्त्री भट्टराईले जेनजी आन्दोलनको बलमा बनेको नयाँ सरकारले पीडित नर्सहरूको समस्या तत्काल न्यायपूर्ण ढंगले सम्बोधन गर्नुपर्नेमा जोड दिएका छन्।
