हिमाल प्रेस 
युक्रेनी राष्ट्रपति भोलोदिमिर जेलेन्स्की र रुसी राष्ट्रपति भ्लादिमिर पुटिन। तस्बिर : एपी/रासस
युक्रेनका राष्ट्रपति भोलोदिमिर जेलेन्स्कीले युद्ध अन्त्य गर्ने प्रयासस्वरूप रूसी राष्ट्रपति भ्लादिमिर पुटिनसँग प्रत्यक्ष भेटवार्ताको आह्वान गरेका छन्।
रूसी राष्ट्रपतिलाई खुलापत्रमार्फत युक्रेनी नेताले युरोपको युद्ध फेरि अमेरिकाको ध्यानको केन्द्रमा नपुग्दासम्म पर्खिरहनु गलत हुने भन्दै युक्रेन र रूसबीच प्रत्यक्ष संवादमार्फत मात्र शान्ति सम्भव हुने बताएका छन्।
उनले प्रस्तावित वार्ताको अवधिभर पूर्ण युद्धविरामको माग पनि गरेका छन्। यद्यपि त्यसलाई पुटिनले बिहीबार नै अस्वीकार गरिसकेका थिए।
अमेरिकी राष्ट्रपति डोनाल्ड ट्रम्पले बिहीबार दुवै नेताबीच भेट हुनु उत्तम हुने बताएका छन्।
क्रेमलिनले पत्र प्राप्त भएको पुष्टि गरेको छ र पुटिनलाई यसबारे जानकारी दिइने बताइएको छ।
पत्रको भाषा आक्रामक मात्र होइन, व्यंग्यात्मसमेत रहेको छ, जसमा युक्रेनले हालै रूसी भूमिमा गरेका आक्रमणको पनि उल्लेख गरिएको छ।
जेलेन्स्कीले २६ वर्ष सत्तामा रहेपछि पुटिनको उमेरले असर गर्न थालेको छ भन्दै टिप्पणी गरेका छन्।
पत्रमा उनले औपचारिक रूपमा भेटवार्ताको प्रस्ताव पनि राखेका छन्।
‘युक्रेन यो युद्ध अन्त्य गर्न हाम्रो बीचमा प्रत्यक्ष संवादको प्रस्ताव गर्छ- म तपाईंलाई भेट्न प्रस्ताव गर्दै छु’, जेलेन्स्कीले लेखेका छन्।
यो युक्रेनी नेताको नयाँ प्रस्ताव होइन।
यसअघि जस्तै, क्रेमलिनले प्रतिक्रिया दिँदै पुटिनलाई मस्कोमा भेट्न जेलेन्स्कीलाई स्वागत गर्ने बताएको छ।
विशेष ध्यान आकर्षित गर्ने विषय भनेको किभले अमेरिका अहिले इरान विषयमा पूर्ण रूपमा केन्द्रित छ भन्ने सार्वजनिक स्वीकारोक्ति हो।
‘युरोपको युद्ध फेरि अमेरिकाको ध्यानको केन्द्रमा नआएसम्म पर्खनु गलत हुनेछ’, जेलेन्स्कीले लेखेका छन्।
सेन्ट पिटर्सबर्गमा विदेशी पत्रकारहरूसँग बोल्दै पुटिनले आफू युक्रेनसँग सम्झौतामा पुग्न पूर्ण रूपमा तयार र इच्छुक रहेको बताएका छन्।
पुटिनले रूस युद्ध जितिरहेको दाबी गर्दै युक्रेनले भूभाग छोड्नुपर्ने बताएका छन्। उनका अनुसार ट्रम्प इरानमा व्यस्त रहेकाले युरोपेली संघले जेलेन्स्कीलाई क्षेत्रीय सम्झौता गर्न मनाउन सक्छ।
पुटिनको लामो समयदेखिको अडानअनुसार युक्रेन रूसद्वारा आंशिक रूपमा कब्जा गरिएका डोनेत्स्क, लुहान्स्क, खेरसोन र जापोरिझिया क्षेत्रबाट फिर्ता हुनुपर्छ र नेटोमा प्रवेश गर्ने प्रयास त्याग्नुपर्छ।
युक्रेनले भूभाग छोड्ने प्रस्ताव अस्वीकार गर्दै आएको छ, किनभने त्यसले २०२२ मा जस्तै रूसलाई पुनः आक्रमण गर्न प्रोत्साहन दिने उसको तर्क छ।
जेनेभा, अबुधाबी र इस्तानबुलमा भएका शान्ति वार्ताहरू असफल भएपछि पछिल्ला महिनामा युद्धविराम वार्ता ठप्प छन्।
झण्डै अठार सय शब्दको पत्रमा जेलेन्स्कीले लेखेका छन्- ‘तपाईंले यस युद्धले हाम्रो देशमा ल्याएको सबै कुरा पछि रूसी सैनिकहरूको भविष्यबारे हामी चिन्तित छैनौँ। म युक्रेनीहरूको चिन्ता गर्छु। हामी आफ्ना मानिसहरू गुमाइरहेका छौँ र प्रत्येक क्षति पीडादायक छ।’
जेलेन्स्कीले रूसमा युक्रेनी ड्रोन र मिसाइल आक्रमण, पेट्रोलको अभाव र बढ्दो मूल्यका कारण रुसी नागरिक पनि युद्धबाट थकित हुँदै गएको बताएका छन्।
उनले पुटिनलाई भनेका छन्, ‘यो युद्धबाट बाहिर निस्कने बाटो लिन डराउनुहोस्।’
उनका अनुसार वार्ता स्विट्जरल्यान्ड वा टर्कीजस्ता तेस्रो देशमा हुन सक्छ।
युक्रेनी परराष्ट्रमन्त्री अन्द्री सिबिहाले खुला पत्रलाई युद्ध अन्त्य गर्ने ‘गम्भीर र अर्थपूर्ण प्रस्ताव’ भनेका छन्।
