मोदी र पुटिनबीच भेट : व्यापार, ऊर्जा र रक्षाबारे छलफल

काठमाडौँ- रुसका राष्ट्रपति भ्लादिमिर पुटिन र भारतीय प्रधानमन्त्री नरेन्द्र मोदीबीच शुक्रबार नयाँ दिल्लीमा भेट भएको छ।

भेटका क्रममा दुवै जनाबीच व्यापार, ऊर्जा र रक्षाबारे कुराकानी भएको छ।

राष्ट्रपति पुटिन शनिबार सुरू हुने ११ सदस्यीय ब्रिक्स शिखर सम्मेलनमा सहभागी हुन नयाँ दिल्ली आएका हुन्।

मस्को नयाँ दिल्लीको सबैभन्दा महत्वपूर्ण रणनीतिक साझेदार र सैन्य आपूर्तिकर्ता हो। भारतीय टेलिभिजनमा दुवै नेता नयाँ दिल्लीको सम्मेलन केन्द्रमा हाँस्दै र एकअर्कालाई पिठ्यूँमा धाप मारेको र अँगालो हालेको तस्वीर सार्वजनिक भएका छन्।

अमेरिका–इरान युद्धका कारण उत्पन्न ऊर्जा संकटमा भारतले रुसतर्फ ध्यान दिएको छ। युक्रेनमा रुसको युद्ध र वासिङ्टनलगायत पश्चिमी देशहरूको दबाबका बाबजुद पनि भारतले रुसी तेल किनिरहेको छ।

नेता पुटिन सन् २०२५ डिसेम्बरमा भारत आएका थिए। यस महिनाको सुरुमा किर्गिस्तानको बिस्केकमा भएको शाङ्घाई सहयोग संगठनको बैठकमा पनि दुवै नेता भेटेका थिए।

त्यहाँ भारतीय प्रधानमन्त्री मोदीले पुटिनलाई ‘अनन्त युद्धबाट युद्धको अन्त्यतिर अघि बढ्न’ आग्रह गरेका थिए।

पश्चिम एसिया युद्ध सुरु भएपछिका हप्ताहरूमा मार्चमा भारतीय रिफाइनरीहरूले रुसबाट कच्चा तेलको आयात झण्डै दोब्बर बनाएका थिए। प्रतिबन्धमा अस्थायी अमेरिकी छूटले यसमा सहयोग पुगेको थियो।

व्यापारिक सूचना कम्पनी केप्लरका अनुसार जुनमा आयात बढेर दैनिक २७ लाख १० हजार ब्यारेल पुगेको थियो भने जुलाईमा यो २८ लाख १० हजार ब्यारेलको उच्चस्तरमा पुगेको थियो।

अगस्तमा भने घटेर दैनिक २० लाख ७० हजार ब्यारेल भए पनि अझै महत्वपूर्ण मात्रामा नै छ।

भारतीय सरकारी तथ्यांकअनुसार सन् २०२५/२६ मा दुई देशबीचको वस्तु व्यापार ५९.९ अर्ब डलर पुगेको थियो। भारतले ४.४९ अर्ब डलर निर्यात गर्दा ५५.३७ अर्ब डलरको आयात गरेको थियो।- रासस/एएफपी