चितवनमा धेरै भारी वर्षा, अरू जिल्लामा कति छ रेकर्डमा?

काठमाडौँ- पछिल्लो १२ घण्टामा चितवनमा धेरै भारी अर्थात् १२६ मिलिमिटर वर्षा भएको छ । जल तथा मौसम विज्ञान विभागका अनुसार चितवनपछि गोरखा र उदयपुरमा धेरै भारी नजिक वर्षा भएको छ ।

विभागको मापन केन्द्रमा रेकर्ड भएको विवरणअनुसार गोरखामा ८१.२ मिलिमिटर वर्षा भएको छ भने उदयपुरमा ९० मिलिमिटर वर्षा भएको छ । मौसम विज्ञान विभागले १०० मिलिमिटरभन्दा माथि वर्षा भएमा त्यसलाई धेरै भारी वर्षा भएको भनेर परिभाषित गर्ने गरेको छ । यस्तै, लमजुङमा पनि ७६ मिलिमिटर वर्षा भएको छ ।

यस्तै अन्य केही जिल्लामा भारी वर्षा मापन भएको छ । जसअनुसार इलाममा ५०, झापामा ५४।४, सिन्धुपाल्चोकमा ४५.६, नुवाकोटमा ४३, मिलिमिटर वर्षा भएको छ । यी सबै मापन केन्द्रमा भारी वर्षा भएका हुन् ।

अन्य दुई दर्जन बढी मापन केन्द्रहरूमा २० मिलिमिटरभन्दा कम वर्षा भएका छन् । अहिले पनि इलाम, झापा, सिन्धुली, दोलखा, नुवाकोट, लमजुङलगायत जिल्लामा वर्षा भइरहेको छ । चितवनलगायत केही जिल्लामा भने रोकिएको छ ।

विभागको मौसम पूर्वानुमान महाशाखाका अनुसार हाल नेपालमा पश्चिमी न्यूनचापीय प्रणाली, उपल्लो वायुमण्डलमा रहेको उच्च चापीय प्रणाली र नेपालको पूर्वी भूभाग नजिक तल्लो वायुमण्डलमा रहेको न्यून चापीय क्षेत्रको आंशिक प्रभाव रहेको छ ।

अहिले कोशी, बागमती गण्डकी लुम्बिनीसहित कर्णाली र सुदूरपश्चिम प्रदेशको पहाडी र हिमाली भूभागमा साधरणतया बादल लागेको छ । कोशी, बागमती र गण्डकी प्रदेशका थोरै स्थानमा मेघगर्जन, चट्याङ र हुरी बताससहित वर्षा भइरहेको छ ।

आज राति र शुक्रबारको अवस्था

आज राति देशभर साधरणतया बादल लाग्ने तथा कोशी, मधेस, बागमती र गण्डकी प्रदेशका केही स्थान तथा लुम्बिनी, कर्णाली र सुदूरपश्चिम प्रदेशको पहाडी र हिमाली भूभागका एकदुई स्थानमा मेघगर्जन र चट्याङसहित हल्कादेखि मध्यम वर्षा र हिमपातको सम्भावना रहेको छ ।

शुक्रबार कोशी प्रदेशलगायत बाँकी पहाडी र हिमाली भूभागमा साधारणतया बादल लाग्ने तथा बाँकी भूभागमा आंशिक बादल लाग्नेछ । कोशी प्रदेशलगायत बागमती, गण्डकी र लुम्बिनी प्रदेशका पहाडी र हिमाली भागका थोरै स्थान, कर्णाली र सुदूरपश्चिम प्रदेशका पहाडी र हिमाली भूभाग तथा मधेस, बागमती र गण्डकी प्रदेशको तराई भूभागका एकदुई स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ ।