हिमाल प्रेस 
ढाका- बंगलादेश नेसनलिस्ट पार्टी (बिएनपी) ले सन् २०२४ को विद्यार्थी नेतृत्वको विद्रोहपछि सम्पन्न पहिलो संसदीय निर्वाचनमा बहुमतसहित विजय हासिल गरेको छ।
वर्षौंदेखि तीव्र राजनीतिक ध्रुवीकरण र विवादित चुनावले प्रभावित बंगलादेशको राजनीतिमा यो परिणामले नयाँ अध्याय सुरु गर्ने संकेत दिएको छ।
निर्वाचन आयोगले अन्तिम आधिकारिक नतिजा सार्वजनिक नगरे पनि स्थानीय सञ्चारमाध्यमहरूले ३५० सदस्यीय संसद्मा बहुमतका लागि आवश्यक १५१ सिटको सीमा बिएनपीले पार गरेको जनाएका छन्।
संसद्मा महिलाका लागि आरक्षित ५० सिट विजयी दलहरूबीच आनुपातिक रूपमा बाँडिने व्यवस्था छ। विपक्षी इस्लामवादी जमात-ए-इस्लामीले नतिजा सार्वजनिक गर्न ढिलाइ भएको भन्दै असन्तुष्टि जनाएको छ तर बिएनपीको मिडिया एकाइले पार्टीले एक्लै सरकार गठन गर्न पर्याप्त सिट जितेको जनाएको छ।
बिएनपी ६० वर्षीय तारिक रहमानको नेतृत्वमा रहेको छ। उनी १७ वर्षको स्वनिर्वासनपछि गत डिसेम्बरमा लन्डनबाट स्वदेश फर्किएका हुन्। उनी पूर्वप्रधानमन्त्री खालिदा जियाका सुपुत्र हुन्। खालिदाको डिसेम्बरमै निधन भएको थियो। पार्टीका वरिष्ठ संयुक्त महासचिव रुहुल कबिर रिजवीले जनतालाई धन्यवाद दिँदै विजयको बधाई व्यक्त गरेका छन्।
रहमानका प्रेस सचिव सालेह सिबलीका अनुसार उनले समर्थकहरूलाई विजय उत्सवका र्याली नगर्न, बरु नियमित शुक्रबारको नमाजसँगै विशेष प्रार्थना गर्न आह्वान गरेका छन्।
ढाकास्थित अमेरिकी दूतावासले रहमान र उनको दललाई ऐतिहासिक विजय भन्दै बधाई दिएको छ। बंगलादेशका लागि अमेरिकी राजदूत ब्रेन्ट टी. क्रिस्टेनसेनले सामाजिक सञ्जालमार्फत दुई देशबीच समृद्धि र सुरक्षाका साझा लक्ष्यमा सहकार्य गर्ने प्रतिबद्धता व्यक्त गरेका छन्।
भारतीय प्रधानमन्त्री नरेन्द्र मोदीले यो जितले बंगलादेशी जनताको विश्वास प्रतिबिम्बित गरेको उल्लेख गरेका छन् भने पाकिस्तानका राष्ट्रपति आसिफ अली जर्दारीले लोकतान्त्रिक साझेदारी सुदृढ बनाउन इच्छुक रहेको बताएका छन्।
ऐतिहासिक रूपमा बंगलादेशले भारत र पाकिस्तानसँग मिश्रित सम्बन्ध कायम राख्दै आएको छ। सन् १९७१ मा भारतको सहयोगमा पाकिस्तानबाट स्वतन्त्रता प्राप्त गरेको बंगलादेशमा पूर्वप्रधानमन्त्री शेख हसिनाको कार्यकालमा भारतसँग निकट सम्बन्ध थियो। हसिना गत वर्षको आन्दोलनपछि सत्ताच्युत भई निर्वासनमा गएकी थिइन्। त्यसपछिको अन्तरिम प्रशासन नोबेल शान्ति पुरस्कार विजेता मुहम्मद युनुसको नेतृत्वमा गठन भएको थियो।
यस पटकको निर्वाचन मुख्यतः बिएनपी र जमात-ए-इस्लामी नेतृत्वको ११ दलीय गठबन्धनबीच प्रतिस्पर्धा भएको थियो। स्थानीय टेलिभिजन च्यानलहरूका अनुसार गठबन्धनले कम्तीमा ७७ सिट जित्दै उल्लेखनीय उपस्थिति जनाएको छ।
जमात-ए-इस्लामीका प्रमुख शफिकुर रहमानले ढाकाबाट जित हासिल गरेका छन् र संसद्मा प्रमुख विपक्षी नेताका रूपमा देखिएका छन्। तर पार्टीले धेरै क्षेत्रमा नतिजा घोषणा गर्न ढिलाइ र अनियमितता भएको आरोप लगाएको छ।
विद्रोहका विद्यार्थी नेताहरूले स्थापना गरेको नेसनल सिटिजन पार्टीले पनि केही सिट जित्दै आफ्नो उपस्थिति जनाएको छ। पार्टी प्रमुख नाहिद इस्लामसहित शीर्ष नेताहरू निर्वाचित भएका छन्।
यो मतदानलाई बंगलादेशको लोकतन्त्रका लागि महत्त्वपूर्ण परीक्षणका रूपमा हेरिएको थियो। जुलाई २०२४ को आन्दोलनले शेख हसिनालाई सत्ताबाट हटाएपछि सम्पन्न पहिलो चुनाव भएकाले यसलाई लोकतान्त्रिक विश्वास पुनःस्थापित गर्ने अवसरका रूपमा लिइएको थियो। साथै, प्रधानमन्त्रीको कार्यकाल सीमित गर्ने र कार्यकारी शक्तिमा नियन्त्रण कडा पार्ने प्रस्तावसहितको जनमतसङ्ग्रह पनि सँगै सम्पन्न भएको छ जसको नतिजा सार्वजनिक हुन बाँकी छ।
पछिल्ला १५ वर्षमध्ये अधिकांश समय बिएनपी विपक्षमा रह्यो र उसले चुनावी अनियमितता तथा राजनीतिक दमनको आरोप लगाउँदै केही निर्वाचन बहिष्कारसमेत गरेको थियो।
तारिक रहमानविरुद्ध लगाइएका भ्रष्टाचार तथा अन्य मुद्दा हसिनाको सरकार पतनपछि खारेज गरिएका थिए। उनले ती आरोपलाई राजनीतिक रूपमा प्रेरित बताउँदै अस्वीकार गरेका थिए।
बिएनपी र अवामी लिगबीचको लामो प्रतिस्पर्धाले बंगलादेशको राजनीतिक दिशा निर्धारण गर्दै आएको छ। विश्लेषकहरूले भने नयाँ सरकारमाथि सुशासन, पारदर्शिता र लोकतान्त्रिक अभ्यास सुदृढ गर्ने ठोस दबाब रहने उल्लेख गरेका छन्।
