हिमाल प्रेस 
प्रतिनिधिमूलक तस्बिर।
काठमाडौँ- अवैध लागुऔषध ब्राउन सुगरसहित कोटेश्वरबाट प्रहरीले आठ जनालाई पक्राउ गरेको छ। काठमाडौँ महानगरपालिका–३२ कोटेश्वरबाट उनीहरू पक्राउ परेका हुन्। शंकास्पद गतिविधि गरिरहेको अवस्थामा खानतलासी गर्दा उनीहरूका साथबाट ३३.७६ ग्राम ब्राउन सुगर बरामद गरिएको प्रहरीले जनाएको छ।
पक्राउ पर्नेमा ललितपुरका २७ वर्षीय रफिस अवाले, काभ्रेपलाञ्चोक नमोबुद्धका १९ वर्षीय रिसफ श्रेष्ठ, मोरङ कानेपोखरीका २१ वर्षीय रेमन राई, बेलबारीका ३३ वर्षीय अमितकुमार चौधरी र ३६ वर्षीय प्रमोद राई छन्।
त्यसैगरी पाँचथरको मिक्लाजुङका २८ वर्षीय मेहरमान भुजेल, फिदिमका २७ वर्षीय टिम्पल तामाङ, फाल्गुनन्दका २९ वर्षीय भीमकुमार चेम्जोङ पनि पक्राउ परेका जिल्ला प्रहरी परिसर काठमाडौँले जनाएको छ।
प्रहरीले उनीहरूका साथबाट लागुऔषध ट्रामाडोल आठ ट्याब्लेट, मोटरसाइकल र स्कुटर एक÷एक थान, नगद ५५ हजार दुई सय, १४ थान मोबाइल, आइप्याड एक थान, झोला एक थान, तौल गर्ने डिजिटल मेसिन एक थान र पर्स एक थान बरामद गरेको छ। रासस
