हिमाल प्रेस 
फाइल तस्बिर
काठमाडौँ- अमेरिकी उपराष्ट्रपति जेडी भान्सले सन् २०२८ को राष्ट्रपतीय निर्वाचनमा उम्मेदवारी घोषणा नगरे पनि उनको राजनीतिक सक्रियता र समर्थकहरूको उत्साहले सम्भावित उम्मेदवारीबारे चर्चा चुलिएको छ।
तर, आगामी नोभेम्बरमा हुने मध्यावधि निर्वाचनमा रिपब्लिकन पार्टीले चुनौतीपूर्ण प्रतिस्पर्धाको सामना गर्नुपर्ने देखिएको छ।
अमेरिकी राष्ट्रपति डोनाल्ड ट्रम्पका निकट सहयोगी भान्स शुक्रबार आफ्नो गृहराज्य ओहायोको लिमामा आयोजित चुनावी सभामा सहभागी भए। आगामी मध्यावधि निर्वाचनका लागि रिपब्लिकन उम्मेदवारहरूको समर्थनमा आयोजित सभामा उनी पुग्दा समर्थकहरूले भव्य स्वागत गरेका थिए। त्यहाँ ‘भान्स २०२८’ लेखिएको टोपी लगाएका समर्थकसमेत देखिएका थिए।
यद्यपि भान्सले आगामी राष्ट्रपतीय निर्वाचनसँग ओहायोको मध्यावधि चुनावको कुनै सम्बन्ध नरहेको बताएका छन्। उनका अनुसार निर्वाचनको महत्व आगामी वर्षहरूमा देशको शासन सञ्चालनसँग जोडिएको छ।
तर जनमत सर्वेक्षणहरूले राष्ट्रपति ट्रम्पको घट्दो लोकप्रियता, इरानसँगको युद्ध र बढ्दो जीवनयापन खर्चका कारण रिपब्लिकनहरूले अमेरिकी कंग्रेसमा आफ्नो बहुमत गुमाउन सक्ने संकेत गरेका छन्।
ओहायोमा सिनेटको सिट र गभर्नर पदका लागि पनि कडा प्रतिस्पर्धा हुने देखिएको छ। गभर्नर पदमा पूर्वराष्ट्रपतीय उम्मेदवार विवेक रामास्वामी चुनावी मैदानमा छन्। ट्रम्पले समेत हालै उक्त राज्यको भ्रमण गरेका थिए।
कांग्रेसमा बहुमत गुमाउनु ट्रम्पका लागि राजनीतिक रूपमा कठिन हुन सक्छ। त्यसले उनको कार्यकालको बाँकी दुई वर्षमा डेमोक्र्याटहरूले विभिन्न अनुसन्धान अघि बढाउने सम्भावना बढाउन सक्छ। अर्कोतर्फ, ओहायोमा रिपब्लिकनहरूको कमजोर प्रदर्शनले भान्सको राजनीतिक छविमा पनि असर पार्न सक्छ।
सन् २०२८ को दौडमा भान्स अगाडि?
ट्रम्पको सम्भावित उत्तराधिकारीका रूपमा भान्सलाई रिपब्लिकन पार्टीभित्र बलियो दाबेदार मानिन्छ। तर उनले उम्मेदवारीबारे औपचारिक घोषणा गरेका छैनन्।
अमेरिकी विदेशमन्त्री मार्को रुबियोले पनि भान्सविरुद्ध प्रतिस्पर्धा नगर्ने बताएका छन्। यद्यपि रुबियोका सार्वजनिक अभिव्यक्तिलाई सम्भावित राष्ट्रपतीय आकांक्षासँग जोडेर हेरिएको छ।
४२ वर्षीय भान्सले आफ्नो राजनीतिक छवि बलियो बनाउन परिवारलाई समेत सार्वजनिक कार्यक्रममा सहभागी गराउन थालेका छन्। उनले पत्नी उषा, तीन सन्तान र एटलस नामको कुकुरसँग सिनसिनाटी यात्रा गरेका थिए, जहाँ उनले अग्रिम मतदान गरे।
रिपब्लिकन नेसनल कमिटीको आर्थिक संकलनसम्बन्धी जिम्मेवारीले पनि उनलाई प्रभावशाली दाताहरूसँग निकट बनाएको छ।
ट्रम्प प्रशासनसँग जोडिएका नीतिका कारण उत्पन्न राजनीतिक दबाबबाट अलग देखिने प्रयासमा रहेका भान्सले अमेरिकी परिवारको आर्थिक कठिनाइप्रति आफू सचेत रहेको सन्देश दिँदै आएका छन्। यसले विगतमा ट्रम्पप्रति आफ्नो आलोचनात्मक धारणा राखेका कारण बनेको राजनीतिक छवि परिवर्तन गर्न पनि सहयोग पुग्न सक्छ।
शुक्रबार उनले पेन्टागन प्रमुख पिट हेगसेथको मृत्युदण्डसम्बन्धी घोषणाबाट आफूलाई अलग राख्ने संकेत दिए। अमेरिकी सेनाले फायरिङ स्क्वाडमार्फत दिइने मृत्युदण्डको प्रत्यक्ष प्रसारण गर्ने विषयमा सोधिएको प्रश्नमा भान्सले आफूले त्यस्तो प्रसारण नहेर्ने बताए।
