हिमाल प्रेस 
म्याग्दी- यहाँको धवलागिरि गाउँपालिका–१ गुर्जामा पहिलो पटक फिल्मको छायांकन गरिएको छ । छन्त्याल र दलित समुदायको बसोबास रहेको परम्परागत ढुङ्गे घरहरू गुजमुज्ज मिलेर बसेको गुर्जा गाउँमा फिल्म सारथीको छायांकन सुरु गरिएको हो ।
सदरमुकाम बेनीदेखि सबैभन्दा टाढाको दूरीमा जिल्लाको अन्तिम बस्तीका रूपमा रहेको गुर्जामा यसअघि विभिन्न म्युजिक भिडियोको छायांकन गरिएको भए पनि पहिलो पटक फिल्मको छायांकन थालिएको हो।
गुर्जा र चुरेन हिमाल अवस्थित गुर्जामा रहेको प्राकृतिक, सांस्कृतिक र परम्परागत जनजीवनको पाटोलाई समेत समेटेर फिल्मका दृश्य खिच्न थालिएको छ । सामाजिक कथावस्तुमा आधारित सारथी फिल्मको निर्माण टिम दुई सातादेखि गुर्जामै बसेर फिल्म निर्माणका लागि कलाकारहरूको अभिनय छायांकन गरिरहेको प्रमुख निर्माता तारा थापाले बताए ।
फिल्म निर्माणका लागि करिब ६० जनाको समूह गुर्जामा पुगेका छन् । गुर्जाको मुख्य बस्ती, देउराली डाँडालगायत क्षेत्रमा दृश्य छायांकनको काम भइरहेको छ । उत्तम प्रधान, निरुता सिंह, मुकुन्द श्रेष्ठ, राजेन्द्र केसीलगायत नेपाली फिल्म क्षेत्रका चर्चित कलाकारको अभिनय रहने यस फिल्ममा गुर्जाकै कलाकार गिरी विश्वकर्मासहित गायत्री जोशी, मदन थापा, मिलन खड्का, रश्मी गुरुङ, तुलसी राई, आशा विश्वकर्मालगायतका नयाँ कलाकारको पनि अभिनय रहनेछ ।
यस फिल्मको अधिकांश दृश्य गुर्जा वरपर नै छायांकन गरिने निर्देशक कुमार गजुरेलले जानकारी दिए । गुर्जाकै सामाजिक विषयलाई कथावस्तु बनाएर तयार गर्न लागिएको यस फिल्मको माध्यमबाट गुर्जामा लुकेर रहेको पर्यटन सम्भावनालाई समेत विश्वमाझ परिचित गराउन सहयोग पुग्ने निर्देशक गजुरेलले बताए ।
“केही वर्षअघि हामी गुर्जा हिमालको आधार शिविर पुगेका थियौँ, त्यसबखत नै हामीले गुर्जामा फिल्म बनाउने निधो गरेका थियौँ, यहाँको भूबनोट र प्राकृतिक सौन्दर्यताले गुर्जालाई फिल्म सिटीका रूपमा विकास गर्न सकिने प्रशस्त सम्भावना छ”, उनले भने । गुर्जामा संसारलाई चिनाउनुपर्ने धेरै ठाउँ र कला संस्कृति भएकाले राष्ट्रियस्तरबाट यसको पहल हुनुपर्ने उनको भनाइ छ ।
जिल्लाकै सबैभन्दा दुर्गम बस्तीको उममा पाएको गुर्जामा हालै मात्र सडक सञ्जालको पहुँच जोडिएको छ । भूगोलले दूरी टाढा भए पनि प्राकृतिक सौन्दर्य र सम्भावनाले भरिपूर्ण गुर्जामा फिल्म छायांकनले राष्ट्रिय तथा अन्तराष्ट्रियस्तरमा प्रचारप्रसारमा सघाउने धवलागिरि गाउँपालिका–१ गुर्जाका वडाध्यक्ष झकबहादुर छन्त्यालले बताए । “पहिले केही गीतहरूको भिडियो छायांकन भएका थिए, यस पटक ठुलो पर्दाको फिल्म नै यहाँ बनिरहेको छ, यसले गुर्जालाई थप परिचित गराउन भूमिका खेल्ने अपेक्षा गरेका छौं”, वडाध्यक्ष छन्त्यालले भने ।
किम्भे प्रोडक्सन तथा धीरज इन्फिनिटी फिल्मस्को सहकार्यमा फिल्म बन्नेछ । तीस वर्ष लामो फिल्म सम्पादनको अनुभव सम्हालेका तारा थापाले निर्माण गर्न लाग्नुभएको यस फिल्मको निर्मातामा सौर्यल थापा, रदिप श्रेष्ठ, धीरज तामाङ र प्रदीप रायमाझी निर्माताका रूपमा रहेका छन् भने कुमार गजुरेलको डेव्यु निर्देशन रहेको छ ।
