लम्पी स्किन : तनहुँमा धमाधम खाेप लगाइँदै

दमाैली- तनहुँमा लम्पी स्किन रोगले गोरु मरेपछि कृषकलाई खेत जोत्नै समस्या भएको छ। धान रोपाइँको चटारोका बीचमा गोरु मरेपछि किसान समस्यामा परेका छन्। जिल्लाका दशवटै पालिकाका चार हजार एक सय ७६ पशुमा लम्पी स्किन रोग फैलिएकामा ४७ पशु मरेका छन्।

यसमध्ये ४३ गोरु रहेको भेटेरिनरी अस्पताल तथा पशु सेवा विज्ञ केन्द्र तनहुँका प्रमुख डा. बालकुमार श्रेष्ठले जानकारी दिए। ‘खेतीपातीको समयमा गोरु मर्दा किसानलाई खेत जोत्न समस्या भएको छ,’ उनले भने, ‘गोरुको विकल्प ट्र्याक्टर भए पनि कतिपय किसानले ट्र्याक्टर किन्न सक्ने अवस्था छैन।’

उनका अनुसार लम्पी स्किन संक्रमण भएकै अवस्थामा काममा लगाउँदा त्यसैका कारण पशुको मृत्यु भएको हुनसक्ने देखिएको छ। ‘लम्पी स्किन संक्रमण हुँदैमा मृत्यु हुने होइन, बिरामी भएको अवस्थामा काम गर्नुपर्दा पशुलाई गाह्रो भएर मृत्यु भएको देखिएको छ,’ डा श्रेष्ठले भने।

लम्पी स्किनविरुद्ध जिल्लामा दश हजार पाँच सय पशुलाई खोप लगाइसकिएको छ। स्थानीय तहको समन्वयमा लम्पी स्किन संक्रमणबाट बचाउन दश हजार पाँच सय स्वस्थ पशुलाई खोप लगाइएको श्रेष्ठले जानकारी दिए। ‘यो खोप संक्रमित भएको पशुलाई नभई संक्रमण नभएका पशुलाई रोगबाट बचाउन लगाउने हो।’

सबैभन्दा बढी व्यास नगरपालिकामा पशुलाई खोप लगाइएको छ। व्यासमा तीन हजार पशुलाई खोप लगाइएको कार्यालयले जानकारी दिएको छ। खोप लगाउनका लागि स्थानीय तहले आफैँ खरिद गरेका थिए।

नगरपालिकाले कृषकको गोठमै पुगेर खोप लगाइदिएको नगरपालिकाका पशुपन्छी विकास उपशाखा प्रमुख डा. मनोज विश्वकर्माले जानकारी दिए। पशुमा पूर्णखोप कार्यक्रमअन्तर्गत नगरपालिकाको वडामा खोपकर्ताको रूपमा खटिएका भेटेरिनरी प्राविधिकलाई पुनः यस आकस्मिक अवस्थामा खोप लगाउन परिचालित गरिएको उनले जानकारी दिए।

उक्त रोगबाट धेरैजसो व्यास नगरपालिका–१ चारकुने, व्यास नगरपालिका–१३ बेलबास, पोखरीभज्याङ, व्यास नगरपालिका– ११ फराकचौर र व्यास नगरपालिका–७ मा गाईभैँसी संक्रमित भएका थिए।

जिल्लाको म्याग्दे गाउँपालिकाले दुई हजार गाईभैँसीलाई उक्त खोप लगाएको छ। गाउँपालिकाले सातवटै वडामा पालिएका पशुलाई खोप लगाएको पशु सेवा शाखा प्रमुख डा. विनय शाहले जानकारी दिए। उनका अनुसार पहिलो चरणमा दूध उत्पादन धेरै हुने वडाका पशुलाई प्राथमिकतामा राखेर खोप लगाइएको हो। ‘व्यावसायिक रूपमा गाईभैँसी पालन गरिएका र दूध उत्पादन बढी गर्ने कृषकको गोठमै पुगेर खोप लगाएका छौँ।’

पहिलो चरणमा दुई हजार खोपको मात्रा आएकाले सोहीअनुसार खोप लगाइएको र आवश्यक परे थप खोप खरिद गरिनेछ। भानु नगरपालिकाका केही ठाउँमा भने कृषकले पशुलाई यो खोप लगाउन आनाकानी गरेका छन्। अन्य पालिकामा भने सहज रूपमा खोप लगाइएको छ। रासस

बाँकेमा लम्पी स्किनविरुद्धको खोप दिन ढिलाइ

सुदूरपश्‍चिममा लम्पी स्किनबाट २६ हजार पशु चौपाया मरे

मनाङमा याक र चौंरीमा पनि देखियो लम्पी स्किन