कुनै पनि बहानामा सार्वजनिक सम्पत्तिको दुरुपयोग गर्नु हुँदैन : रास्वपा

काठमाडौँ- राष्ट्रिय स्वतन्त्र पार्टी (रास्वपा)ले भरतपुर महानगरपालिकाले सडकमा बनाइएको घण्टी चिह्नप्रति सार्वजनिक गरेको सूचनाको समर्थन गरेको छ।

आफ्नो पार्टीको चिह्न सडकमा बनेबाट पर्न गएको असुविधाका लागि क्षमा याचनासमेत गरेको छ। रास्वपाले आज विज्ञप्ति जारी गरी मुलुकका विभिन्न स्थानमा पनि राष्ट्रिय स्वतन्त्र पार्टीका सदस्य, समर्थक तथा शुभेच्छुकले पार्टीको चुनाव चिह्न सार्वजनिक सम्पदामा बनाउने कार्य भएकोप्रति पार्टीको विशेष ध्यानाकर्षण भएको जनाएको छ।

‘राजनीतिक वा कुनै पनि बहानामा सार्वजनिक सम्पत्तिको दुरुपयोग गर्नु हुँदैन भन्ने पार्टीको स्पष्ट मान्यता रहेको सम्बन्धित सबैलाई स्मरण गराउँदै पार्टीको नीति तथा मान्यताबाट बाहिर गएर सार्वजनिक सम्पत्तिको दुरुपयोग नगर्न यही सूचनामार्फत सचेत गराउँदछौँ,’ विज्ञप्तिमा भनिएको छ।

पार्टीप्रतिको लगाव वा अन्य कुनै पनि बहानामा पार्टीको चुनाव चिह्न वा पार्टीको पहिचानसँग सम्बन्धित कुनै पनि सामग्री सार्वजनिक सम्पदाको दुरुपयोग गरेर बनाउने कार्य नगर्न नगराउन तथा गरिएको भएमा साविकै अवस्थामा ल्याइदिन पनि पार्टीले अनुरोध गरेको छ।

रास्वपाले अति राजनीतिकरण र दलतन्त्रले जर्जर भएको अवस्थामा पुनः पुरानै ढाँचाका त्यस्ता गतिविधि नगरी सार्वजनिक सम्पत्तिको संरक्षण तथा प्रवर्द्धनमा स्थानीय निकायको कार्यमा रचनात्मक सहयोग गर्न सम्बन्धित सबैमा अनुरोधसमेत गरेको छ।