विकासप्रेमी सूर्य ध्वजावाहकको जित सुनिश्चित छ : पृथ्वीसुब्बा गुरुङ

काठमाडौँ- नेकपा एमालेका उपाध्यक्ष एवं प्रतिनिधिसभा सदस्य उम्मेदवार पृथ्वीसुब्बा गुरुङले लमजुङमा विकासप्रेमी शक्तिको जित सुनिश्चित भएको दाबी गरेका छन्। बेँसीसहरमा उम्मेदवारी मनोनयन दर्तापछि प्रतिक्रिया दिँदै उनले अपार माया, स्नेह र अभूतपूर्व जनउपस्थितिका बीच आफ्नो मनोनयन दर्ता उत्साहजनक रूपमा सम्पन्न भएको बताए।

जनसमर्थन र उपस्थित नागरिकको उत्साहले आफूलाई लमजुङको सेवामा अझ जिम्मेवार र ऊर्जावान् भएर खटिन प्रेरणा मिलेको उनको भनाइ छ। ‘बेसीसहरमा उर्लिएको जनसागरले लमजुङमा विकासप्रेमी सूर्य ध्वजावाहकको जित सुनिश्चित छ भन्ने सन्देश दिइसकेको छ,’ उनले भने।

मनोनयनका क्रममा उपस्थित भई हौसला प्रदान गर्ने सबैप्रति उनले आभार व्यक्त गरेका छन्। गुरुङले अबको निर्वाचन अभियान गाउँ–गाउँ र बस्ती–बस्तीमा पुग्ने उल्लेख गर्दै विगतदेखि वर्तमान र भविष्यसम्म लमजुङको मुहार फेर्ने अभियानमा जनतासँगै रहने प्रतिबद्धता व्यक्त गरे।

‘हिजो पनि साथमा थियौँ, आज पनि छौँ र भोलि पनि लमजुङ परिवर्तनको अभियानमा सँगै हुनेछौँ,’ उनले भने। नेकपा एमालेतर्फबाट लमजुङ प्रतिनिधिसभा सदस्य उम्मेदवार रहेका गुरुङले विकास, स्थायित्व र समृद्धिलाई आफ्नो प्रमुख एजेन्डा बनाउँदै चुनावी मैदानमा होमिएका छन्।