हिमाल प्रेस 
महोत्तरी- पुस लागेसँगै बढेको चिसो र बाक्लो हुस्सुले महोत्तरीको जनजीवन प्रभावित बनेको छ। विशेषगरी जिल्लाका गरिब र दलित बस्ती बढी समस्यामा परेका छन्।
दक्षिणी भेगमा बिहानदेखि मध्याह्नसम्म बाक्लो हुस्सु र चिसो बतास चल्दा दैनिक ज्यालादारी गर्ने श्रमिक काममा निस्कन सकेका छैनन्। दाउरा अभावका कारण गरिब बस्तीमा झुत्रा लुगा, प्लास्टिक बालेर जाडो छल्नुपरेको स्थानीय बताउँछन्।
चिसो बढेसँगै सडक र हवाई यातायातसमेत प्रभावित भएका छन्। जनकपुर विमानस्थलमा बिहानको उडान हुस्सुका कारण अवरुद्ध हुँदै आएको छ भने सडक यातायात पनि ढिलासुस्ती भएको छ।
जाडोले व्यापार, खेतीपाती र बजार चहलपहल घटेको छ। वृद्धवृद्धा, सुत्केरी र ससाना बालबालिकाको स्याहारसम्भार कठिन बन्दै गएको स्वास्थ्यकर्मी बताउँछन्।
स्वास्थ्य कार्यालयले न्यानो लुगा लगाउन, धुवाँ हुने आगो नबाल्न र आवश्यक नपरी बाहिर ननिस्कन आग्रह गरेको छ। सामाजिक संघसंस्थाले गरिब बस्तीमा दाउरा, न्यानो कपडा र खानपिनको व्यवस्था गर्न स्थानीय तहसँग माग गरेका छन्।
