हिमाल प्रेस 
काठमाडौँ- नेपाल प्रिमियर लिग (एनपीएल) दोस्रो संस्करणको उपाधिका लागि आज (शनिबार) साविक उपविजेता सुदूरपश्चिम रोयल्स र लुम्बिनी लायन्स भिड्दैछन्।
कीर्तिपुरस्थित त्रिवि अन्तर्राष्ट्रिय क्रिकेट रंगशालामा दुई टोलीबीच आज दिउँसो ३ः३० बजे भिडन्त हुँदैछ।
साविक विजेता खेलबाट बाहिरिसकेकाले यस संस्करणमा नयाँ टोली च्याम्पियन बन्ने पक्का छ।
सुदूरपश्चिम र लुम्बिनी दुवै उपाधि हात पार्ने दाउमा छन्। लुम्बिनी नेपाली राष्ट्रिय क्रिकेट टिमका कप्तानसमेत रहेका रोहित पौडेलको नेतृत्वमा छ भने सुदूरपश्चिमको जिम्मा नेपाली राष्ट्रिय क्रिकेट टिमका उपकप्तान दीपेन्द्रसिंह ऐरीले लिएका छन्।
रोयल्स लिग चरण खेल र साविक उपविजेता भएकाले लायन्सभन्दा बलियो देखिएको छ। लिग चरणका सातमध्ये चार खेल जितेर पहिलो क्वालिफायर खेल्दै रोयल्स उपाधिनजिक पुगेको हो।
रोयल्स गत वर्ष फाइनलमा जनकपुर बोल्टससँग पाँच विकेट पराजित हुँदै उपविजेतामा सीमित भएको थियो।
लायन्स यो वर्ष लिग चरणका सातमध्ये चार खेलमा विजयी हुँदै इलिमिनेटर र दोस्रो क्वालिफायर आफ्नो पक्षमा पार्दै फाइनलमा सुरक्षित भएको हो। लुम्बिनी गत संस्करणमा लिग चरणबाटै आउट भएको थियो। लिग चरणको उक्त खेलमा रोयल्स सात विकेटले विजयी भएको थियो।
गत संस्करणमा एकपटक भेट भएकामा लायन्स ४५ रनले पराजित भएको थियो। तेस्रो भेट दुवैका लागि महत्त्वपूर्ण छ। जसले जित्यो, उसले च्याम्पियन बन्दै इतिहास रच्नेछ।
रोयल्सका कप्तान ऐरीले आफूहरू च्याम्पियन बन्न तयार रहेको बताएका छन्।
लायन्सका कप्तान पौडेलले पनि आफूहरू च्याम्पियन बन्नका लागि सबै पक्षबाट तयार रहेको बताएका छन्।
