हिमाल प्रेस 
सिरहा– गोलबजार नगरपालिका–२ टुड्किया सैनिक चोकमा स्कुल बसको ठक्करबाट सात वर्षीय बालकको मृत्यु भएको छ।
ट्रिनिटी बोर्डिङ स्कुलको बसले किच्दा स्थानीय मदन साहका छोरा आदर्शकुमार साहको घटनास्थलमै मृत्यु भएको जिल्ला प्रहरी कार्यालयले जनाएको छ। आदर्श सोही विद्यालयको ‘प्ले ग्रुप’ मा अध्ययनरत थिए।
ग १ ख ३७८८ नम्बरको बसले विद्यालयबाट घर फर्किने क्रममा आदर्शलाई किच्दा उनको टाउकोमा गम्भीर चोट लागि तत्कालै घटनास्थलमा मृत्यु भएको जिल्ला प्रहरी कार्यालयका सूचना अधिकारी एवं प्रहरी नायब उपरीक्षक वीरेन्द्रकुमार पासवानले जानकारी दिए।
उनका अनुसार ठक्कर दिने बसका चालक गोलबजार नगरपालिका–३ का विमल भुजेल घटनापछि फरार भएका छन्। प्रहरीका अनुसार निजको खोजी कार्य जारी छ।
यसैबीच, घटनाप्रति थप अनुसन्धान गर्न स्कुलका संस्थापक एवं प्रधानाध्यापक दिलीप बुढाथोकीसँग प्रहरीले सोधपुछ गरिरहेको उनले जानकारी दिए।
