पक्राउ परे रवि

काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछाने पक्राउ परेका छन्। उपत्यका अपराध अनुसन्धान कार्यालयको टोलीले बुढानीलण्ठस्थित घरबाट लामिछानेलाई पक्राउ गरेको हो।

उच्च अदालतको बुटवल इजलासले शुक्रबार जिल्ला अदालत रुपन्देहीको आदेश बदर गर्दै लामिछानेलाई थुनामा पठाउन आदेश दिएको थियो।

उच्च अदालतको आदेश आएसँगै लामिछानेलाई पक्राउ गर्न प्रहरी उनको घर पुगेको थियो।

लामिछानेले आफैँ गिरफ्तारी दिन लागेको बताएका थिए। आफूमाथि ठूलो अन्याय भएको उनको भनाइ छ।

लामिछानेले सामाजिक सञ्जाल फेसबुकमा लेखेका छन्,‘सम्मानित अदालतको आदेशको सम्मान गर्दै म आफैँ आजै अहिले नै गिरफ्तारी दिँदैछु। साथै न्यायालयका अन्य ढोकाहरू मेरा लागि खुल्ला होलान् नै। न्यायका लागि दुनियाँ सबै ढोका ढकढकाउँछु। ममाथि ठूलो अन्याय भएको छ। चितवनको सभा नरोक्नुस्।’

रुपन्देही जिल्ला अदालतका न्यायाधीश प्रल्हादकुमार योगीको इजलासले बुटवलको सुप्रिम सहकारी ठगी मुद्दामा लामिछानेलाई एक करोड धरौटीमा छाड्न आदेश दिएको थियो। प्रहरीले सुप्रिम सहकारी रकम ठगीमा पहिलो चरणको अनुसन्धान गरेर गत वैशाख ३ मा लामिछाने, पूर्वडीआईजी छविलाल जोशीबाहेक २८ जनालाई प्रतिवादी बनाएर जिल्ला वकिल कार्यालयमा प्रतिवेदन बुझाएको थियो।

लामिछानेसहितका १४ जनाविरूद्ध गत असोज ५ मा पूरक जाहेरी परेपछि इलाका प्रहरी कार्यालयले अनुसन्धान सकेर दर्जन बढी तथ्य र प्रमाणसहित पूरक अभियोग दर्ता गर्न सरकारी वकिल कार्यालयलाई सिफारिस गरेको थियो। दोस्रो चरणको अनुसन्धानपछि पहिलो चरणका प्रतिवादीलाई पनि कसुर र बिगो थपेर प्रतिवादी बनाइएको थियो।