हिमाल प्रेस 
काठमाडौँ- अर्थमन्त्री डा. स्वर्णिम वाग्लेले वास्तविक लगानीको वातावरण देखाउनका लागि नेपाल पूर्वाधार सम्मेलन निकै महत्वपूर्ण रहेको बताएका छन्।
नेपाल पूर्वाधार सम्मेलनबारे जानकारी दिन बिहीबार काठमाडौँमा आयोजित पत्रकार सम्मेलनमा मन्त्री वाग्लेले सम्मेलन केवल भाषण गर्ने वा विदेशी वक्ताहरू मात्र बोलाउनेभन्दा पनि परिणाममुखी र नतिजामूखीका साथै वास्तविक लगानीको वातावरण देखाउन सम्मेलन निकै महत्वपूर्ण रहेको बताए।
उनले सरकारको २१ खर्बको बजेटले मात्रै केही नहुने भन्दै ७० खर्बको अर्थतन्त्रलाई चलायमान बनाउनुपर्ने धारणा राखे। यसका लागि निजी क्षेत्रलाई पनि सरकारले सँगसँगै लिएर अघि बढ्ने उनको भनाइ छ।
मन्त्री वाग्लले पूर्वाधार सम्मेलनपछिको अवस्थालाई ध्यानमा दिएर सरकार अघि बढिरहेको जानकारी दिए।
त्यस्तै कानूनमन्त्री सोविता गौतमले साउन १ गतेदेखि अहिलेसम्म ५४ भन्दा बढी विधेयकहरू मन्त्रिपरिषद्बाट स्वीकृत गरेर अघि बढिसकेको बताइन्। सम्मेलनअघि ५९ वटा कानुनहरू संशोधन गर्नुपर्ने परिस्थिति रहेको उनको भनाइ छ।
उनले लगानीका लागि आवश्यक वातावरण निर्माण गर्न भएका कानुनी तथा नीतिगत व्यवस्थालाई सम्मेलनअघि अन्तिम रुप दिइने धारणा राखिन्।
