हिमाल प्रेस 
राप्रपा अध्यक्ष राजेन्द्र लिङ्गदेन।
तनहुँ– राष्ट्रिय प्रजातन्त्र पार्टीका अध्यक्ष राजेन्द्र लिङ्गदेनले वर्तमान सरकारले भ्रष्टाचार न्यूनीकरण र सुशासनका पक्षमा काम गर्नुपर्ने बताएका छन्।
राष्ट्रिय प्रजातन्त्र पार्टी तनहुँले दमौलीमा आयोजना गरेको कार्यकर्ता भेटघाटमा अध्यक्ष लिङ्गदेन दुई ठूला पार्टी मिलेर सरकार बनेपछि जनभावना अनुसारको काम गर्नेतर्फ ध्यान जानुपर्ने बताए।
अध्यक्ष लिङ्गदेनले वर्तमान सरकारले मूल्यवृद्धि नियन्त्रण, रोजगारी सिर्जना लगायतका क्षेत्रमा काम गर्नुपर्ने बताए। सरकारले जनभावनाअनुसार काम गर्दै जनताको मन जित्न सक्नुपर्नेमा उनको जोड थियो। उनले भने, ‘अहिले सिमेन्टमा मूल्यवृद्धि भएको छ। मूल्यवृद्धि तत्कालै फिर्ता लिनुपर्छ।’
अध्यक्ष लिङ्गदेनले राप्रपाप्रति जनताको आकर्षण बढेको दाबी गर्दै देशभर पार्टी प्रवेशको लहर चलेको उल्लेख गरे। उनले भने, ‘अहिले पार्टीमा प्रवेश कार्यक्रम दिनदिनै भइरहेको छ। बिहानदेखि रातिसम्म प्रवेश कार्यक्रम भइरहेको छ। यो पार्टीप्रतिको विश्वास हो।’
अध्यक्ष लिङ्गदेनले पार्टीमा प्रवेश गरेकाले कहिल्यै पनि पश्चाताप गर्न नपर्ने बताए। उनले भने, ‘पार्टी प्रवेश गरेकाहरूले कहिल्यै गलत गरिएछ भन्ने आभाष हुन दिइनेछैन।’
उनले सरकार बन्नुअघि दुई ठूला पार्टीले संविधान संशोधनको कुरा गर्दा आफूहरूलाई ठिकै लागेको बताउँदै भने, ‘संविधानमा नमिलेका थुप्रै कुराहरू छन्। जसले गर्दा देशमा स्थिरता पनि हुँदैन, विकास पनि हुँदैन। संविधान संशोधन गर्नैपर्ने छ।’
