हिमाल प्रेस 
काठमाडौँ- नेपाल समाजवादी पार्टी (नेसपा) का महाधिवेशन आयोजक समिति संयोजक तथा पूर्वप्रधानमन्त्री डा. बाबुराम भट्टराईले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूविरुद्ध अशोभनीय हर्कत गरिरहेको आरोप लगाएका छन्। आफूले निरन्तर चुनाव जित्दै आएको निर्वाचन क्षेत्र गोरखा-२ दिई चुनाव जिताएर नि:स्वार्थ सहयोग गरे पनि आफूलाई प्रचण्डले अवमूल्यन गरेको भनाइ भट्टराईको छ।
प्रचण्डलाई गोरखा-२ छाडेकोमा मतदाता आफूसँग असन्तुष्ट रहेकोसमेत डा. भट्टराईले स्पष्ट पारेका छन्। साथै उनले उक्त निर्णयमा मतदाता र पार्टीका नेताकार्यकर्तासँग क्षमा मागेका छन्।
संयोजक डा. भट्टराईले सामाजिक सञ्जालमा लेखेका छन्, ‘परन्तु निर्वाचनयता मुख्यतः प्रचण्डको सत्तालिप्सा र दोधारे चरित्र झन् नांगो रूपमा प्रदर्शित हुँदै गइरहेको, उल्टै मैले उनलाई नि:स्वार्थ गरेको सहयोगको बदलामा अनर्गल झुट र जालझेलका प्रपन्च रचेर चरम अशोभनीय हर्कत गर्दै गइरहेको, देश र जनताका आकांक्षामा गम्भीर कुठाराघात गरिरहेको, जनयुद्धमा लाखौं जनताका अतुलनीय त्याग र बलिदानलाई उनको सत्तास्वार्थसँग साटेर सत्य निरूपण तथा मेलमिलाप र बेपत्तासम्बन्धी आयोगहरूका कामलाई टुंग्याउनु सट्टा खेलबाड गरिरहेको लगायतका घटनाक्रमले गोरखाली मतदाताहरूले व्यक्त गरेको असन्तुष्टि र मसँग गरेको गुनासोलाई अन्यथा भन्न सकिने अवस्था रहेन।’
कहिलेकाहीँ असल मनसायले गरेको कामको गलत परिणाम आउँछ र जनसेवामा समर्पित इमानदार मान्छेले त्यसलाई स्वीकारेर सच्याउन हिच्किचाउन नहुने भट्टराईको भनाइ छ।
प्राय: गृहजिल्लामा रहने भट्टराईले मतदाताको कुरा सुन्ने र सोहीअनुसार अगाडि बढ्ने गरिरहेका छन्। भट्टराईले भनेका छन्, ‘अत्यधिक जनसमुदाय र पार्टीका साथीहरूले मैले गत आमनिर्वाचनमा गोरखा–२ बाट उम्मेदवार नबन्नु र प्रचण्डलाई छोडिदिनु गम्भीर गल्ती भएको बताउनुभएको छ। साथै समाजको विकासको स्तर, औसत जनचेतना र विद्यमान संसदीय राजनीतिका प्रमुख खेलाडीहरूको भ्रष्ट,अनैतिक र पाखण्डी चरित्रको ख्याल नगरी ‘गान्धीवादी’ आदर्श र त्यागको मार्ग अवलम्बन गर्नु मेरो कमजोरी रहेको भनेर खुला आलोचना गर्नुभएको छ।’
भट्टराईले २०७९ को संघीय संसद्को चुनावमा आफूले जित्दै आएको निर्वाचन क्षेत्र गोरखा-२ प्रचण्डलाई छाडिदिएका थिए। साथै चुनावी घरदैलोमा सक्रिय भएर प्रचण्डका पक्षमा मत मागेका थिए। प्रचण्डले चुनाव जितेर सरकारमा गएपछि भट्टराईसँगको सम्बन्ध चिसिँदै गएको छ।
देशमा ठूलो राजनीतिक क्रान्तिपछि राष्ट्रिय राजनीति पुनः सत्तादेखि सत्तासम्म र साम, दाम, दण्ड, भेदको दुष्चक्रमा फस्दै गएको बताउँदै डा. भट्टराईले हिजोका क्रान्तिकारी नेताहरू मूल्यमान्यता र आदर्शबाट तीव्र गतिमा स्खलित हुँदै गइरहेको स्पष्ट पारेका छन्।
साथै ठूलो जनबलिदानबाट प्राप्त संघीय लोकतान्त्रिक गणतन्त्र नै धरापमा पर्दै गइरहेको, जनताका सुशासन र समृद्धिका आकांक्षामा गम्भीर तुषारापत भइरहेको सन्दर्भमा आफू सदन र सरकारमा नगई पार्टी र सडकका मञ्चबाट सफा र जनमुखी राजनीतिको पैरवी र सत्तासीनहरूलाई खबरदारी गरेको डा. भट्टराईले बताएका छन्।
