हिमाल प्रेस 
काठमाडौँ- नेपाल सरकारले निजामती कर्मचारी, नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारी (निजामतीकरण प्रयोजन) को नयाँ तलबमान तथा सुविधा साउन १ गतेदेखि लागू गरेको छ।
अर्थ मन्त्रालयको बजेट तथा कार्यक्रम महाशाखाले बुधबार जारी गरेको परिपत्रअनुसार मन्त्रिपरिषद्को साउन ४ गतेको बैठकले गरेको निर्णय कार्यान्वयनका लागि सबै मन्त्रालय, आयोग, सचिवालय तथा कार्यालयलाई निर्देशन दिइएको हो।
परिपत्रमा २०८३ साल साउन १ गतेदेखि लागू हुने गरी सम्बन्धित कर्मचारीलाई नयाँ तलबमान, ग्रेड तथा प्राविधिक ग्रेडअनुसारको सुविधा उपलब्ध गराइने उल्लेख छ।
एक दिनको तलब बराबरको ग्रेड रकम र तलब वृद्धि पश्चात कायम हुने तलबमानको १० प्रतिशत मासिक प्रोत्साहन भत्ता समेत भुक्तानी गर्न निर्देशन दिइएको छ।
अर्थ मन्त्रालयले सम्बन्धित निकायलाई मन्त्रिपरिषद्को निर्णयअनुसार नयाँ तलबमान र सुविधा कार्यान्वयन गरी भुक्तानी प्रक्रिया अघि बढाउन परिपत्रमार्फत आग्रह गरेको छ।
