हिमाल प्रेस 
काठमाडौँ- शिक्षक सेवा आयोगको अध्यक्ष तथा एक महिलासहित दुई सदस्य नियुक्तिका लागि आवेदन आह्वान गरिएको छ।
सूचना अनुसार उम्मेदवारले निश्चित शैक्षिक योग्यता, उमेर र कार्यअनुभव पूरा गरेको हुनुपर्नेछ।
आवेदन दिन चाहने उम्मेदवार नेपाली नागरिक हुनुपर्नेछ। नेपाल सरकारबाट मान्यता प्राप्त विश्वविद्यालयबाट कम्तीमा स्नातकोत्तर उपाधि हासिल गरेको हुनुपर्ने व्यवस्था गरिएको छ।
नियुक्ति हुनुभन्दा कम्तीमा दुई वर्षअघि कुनै पनि राजनीतिक दलको सदस्य नरहेको हुनुपर्नेछ।
उम्मेदवारको उमेर ४० वर्ष पूरा भई ६५ वर्ष ननाघेको हुनुपर्नेछ। कानुन, शिक्षा वा प्रशासनको क्षेत्रमा कम्तीमा १५ वर्ष काम गरेको अनुभव आवश्यक छ।
अध्यक्ष पदका लागि भने थप योग्यता राखिएको छ। अध्यक्ष बन्न नेपाल सरकारको विशिष्ट श्रेणी (विशेष श्रेणी) को अनुभव भएको हुनुपर्नेछ।
सदस्य पदका लागि भने कानुन, शिक्षा वा प्रशासन क्षेत्रमा १५ वर्षको अनुभव भए पुग्ने उल्लेख गरिएको छ।
यसरी आयोगको नेतृत्वका लागि उच्च शैक्षिक योग्यता, लामो कार्यअनुभव, राजनीतिक निष्पक्षता र उमेरसम्बन्धी मापदण्डलाई अनिवार्य बनाइएको सूचनामा उल्लेख छ।
