शिक्षा विधेयकका पेचिला विषय छिटो टुंग्याउनु पर्छ : शिक्षामन्त्री भट्टराई

काठमाडौँ- शिक्षा, विज्ञान तथा प्रविधिमन्त्री विद्या भट्टराईले विद्यालय शिक्षा विधेयक-२०८० लाई छिटो टुंग्याउनुपर्नेमा जोड दिएकी छन्।

सोमबारको शिक्षा, स्वास्थ्य तथा सूचना प्रविधि समितिअन्तर्गत गठित विद्यालय शिक्षा विधेयकसम्बन्धी उपसमितिको बैठकमा बोल्दै उनले यस्तो बताएकी हुन्।

उनले विद्यालय शिक्षा विधेयकलाई धेरै पेचिलो र जटिल भएको बताइन्। उनले भनिन्, ‘यो विधेयक सबैले आशा र प्रतिक्षा गरेको विधेयक हो, त्यसैले सबैले समन्वय गरेर छिटो टुंग्याउनुपर्ने छ।’

भट्टराईले ३५ दिनको कार्य योजना बनाएर उपसमितिले काम सुरु गरेकोमा खुसी प्रकट गर्दै थपिन्, ‘हामीले ३५ दिनको कार्य योजना बनाएर काम सुरु गरेका छौँ।’

मन्त्री भट्टराईले विधेयकको प्रक्रिया सहज बनाउनका लागि संवाद र सहजीकरणको महत्त्वलाई जोड दिँदै भनिन्, ‘जे विषय सहज छन्, त्यसलाई छलफल गर्दै अघि बढ्न आवश्यक छ। जे विषयमा संवाद आवश्यक छ, त्यसका लागि सहजीकरणको काम म मन्त्रालयको तर्फबाट गर्न तयार छु।’

उनले उपसमिति, समिति र मन्त्रालयसँग सहकार्य गरेर समन्वयका साथ अघि बढ्नुपर्ने बताइन्।

शिक्षक महासंघलाई संसदीय उपसमितिले भन्यो- माग पूरा गर्न प्रतिबद्ध छौं, आन्दोलन स्थगित होस्