हिमाल प्रेस 
प्रतीकात्मक तस्बिर
त्रिवेणी (रुकुम पश्चिम)- रुकुम पश्चिमको आठबीसकोट नगरपालिका-२ स्यालामा रहेको खाद्यान्न तथा किराना पसलमा आगलागी हुँदा ३५ लाख बराबरको क्षति भएको छ।
आइतबार साढे १० बजे धनबहादुर बोहराको घरमा आगलागी भएको थियो। आगलागीबाट घरमा रहेको खाद्यान्न तथा किराना पसल, नास्ता पसल, लत्ताकपडासहित नगद ३ लाख ३० हजार गरेर कुल ३५ लाख बराबरको क्षति भएको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक धर्मेन्द्र खड्काले जानकारी दिए।
उनका अनुसार बोहराको चार कोठाको दुईतले जस्तापाताले छाएको कच्ची घर जलेर पूर्णरुपमा नष्ट भएको छ। आगो प्रहरी र स्थानीयको सहयोगमा आज (सोमबार) बिहान नियन्त्रणमा आएको थियो। आगलागीको कारण भने नखुलेको प्रहरी निरीक्षक खड्काले जानकारी दिए।
यसैबीच पीडित परिवारलाई वडा कार्यालयले राहत सहयोग गरेको छ। बोहराका परिवारलाई तत्काल सहयोग पुगोस् भन्ने उद्देश्यले वडाका तर्फबाट एक बोरा चामल, एक बोरा दाल, दुई कम्बल, एक फाइबर सिरक र खाना पकाउनका लागि भाडावर्तन सहयोग गरिएको वडाध्यक्ष देवबहादुर यरीले जानकारी दिए।
