हिमाल प्रेस 
काठमाडौँ- सैनिक श्रीमती संघको सक्रियतामा निकट भविष्यमा काठमाडौँमा फरक क्षमताका बालबालिका लक्षित विद्यालय सञ्चालन हुने भएको छ।
सैनिक श्रीमती संघको ४०औँ वार्षिकोत्सवका अवसरमा जंगी अड्डामा आज (आइतबार) आयोजित कार्यक्रममा उक्त जानकारी दिइएको हो। त्यस अवसरमा प्रधानसेनापति प्रभुराम शर्माले संघको वार्षिक मुखपत्र ‘सेवा सुमन’को विमोचन गरे।
प्रधानसेनापतिले मुखपत्रमा उत्कृष्ट लेखरचनाका सर्जक तथा मूल्यांकन समितिका सदस्यहरूलाई पुरस्कार तथा प्रशंसापत्र प्रदान गरे।
संघले यस वर्ष बाल दिवसको उपलक्ष्यमा आयोजना गरेको अन्तरसैनिक महाविद्यालय चित्रकला, कविता तथा निबन्ध प्रतियोगिताका उत्कृष्ट छात्रछात्रा एवं प्रतियोगिताहरूका मूल्यांकन समितिका सदस्यहरूलाई पनि प्रधानसेनापतिले पुरस्कार तथा प्रमाणपत्र वितरण गरे।
सोही अवसरमा प्रधानसेनापतिले संघले हरेक वर्ष सैनिक महाविद्यालयहरूमा अध्ययनरत जेहेन्दार छात्रछात्राहरूलाई उपलब्ध गराउने विभिन्न प्रकारका छात्रवृत्ति प्रदान गरे। त्यसै गरी, उनले नेपाली सेनाका फरक क्षमता भएका बालबालिकाहरूलाई लक्षित गरी सञ्चालन गर्न लागिएको फरक क्षमता दिवा विद्यालय सञ्चालनार्थ विविध सहयोग पुर्याउनु हुने संघसंस्थाहरूलाई कदरस्वरूप उपहार प्रदान गरे।
कार्यक्रममा बलाध्यक्ष रथी सीताराम खड्का, रथीवृन्द, संघका पदाधिकारीहरू, सैनिक महाविद्यालयहरूका प्राध्यापक, छात्रछात्राहरूलगायत अधिकृत, पदिक तथा अन्य दर्जाको उपस्थिति रहेको थियो।
