छठ पूजाको तयारी गरिरहेका युवकको पोखरीमा डुबेर मृत्यु

सर्लाही- जिल्लाको ईश्वरपुरमा छठ पूजाको तयारी गर्ने क्रममा पोखरीमा डुबेर एक युवकको मृत्यु भएको छ। नगरपालिका वडा नम्बर ६ का अन्दाजी २२-२३ वर्षका युवक सन्तोष साहको मृत्यु भएको इलाका प्रहरी कार्यालय केशरगन्ज बयलबासले जानकारी दिएको हो।

आज बिहान नगरपालिकाको पोखरीटोलमा छठ पूजाको लागि घाट बनाएर पोखरीमा नुहाउन पसेका उनको ११ बजे डुबेर मृत्यु भएको हो।

मृतक साह अध्ययनका लागि अष्ट्रेलिया जाने तयारीमा थिए। उनको मृत्युले अहिले छठ पूजास्थल शोकमग्न भएको छ। शवलाई पोस्टमार्टमका लागि मलंगवा लगिएको प्रहरीले जनाएको छ।