हिमाल प्रेस 
जनकपुरधाम- मधेश प्रदेशका मुख्यमन्त्री सरोजकुमार यादवले आज (मंगलबार) विश्वासको मत लिने भएका छन्। उनले अपराह्न ५ बजे प्रदेशसभा बैठकमा विश्वासको मत लिने प्रदेशसभाका सचीव रंजितकुमार यदवले जानकारी दिए।
सरकार निर्माणको क्रममा सहभागी भएको नेकपा एमालेले सरकारलाई दिएको समर्थन फिर्ता लिएपछि मुख्यमन्त्री यादवले विश्वासको मत लिनुपरेको हो।
एमालेले जेठ १ गते सरकारलाई दिएको समर्थन फिर्ता लिएको थियो। संवैधानिक व्यवस्थाअनुसार सरकार निर्माणमा सहभागी भएको दलले समर्थन फिर्ता लिए ३० दिनभित्र मुख्यमन्त्रीले प्रदेशसभामा विश्वासको मत लिनुपर्ने व्यवस्था छ।
हाल प्रदेश सरकारमा एमाले बाहेक सबै दल सरकारमा सहभागी छन्। प्रदेशसभामा १०७ जना सांसद रहेकाले बहुमतका लागि ५४ जना सांसदको आवश्यकता पर्छ।
प्रकाशित: ३० जेठ २०८० ११:५३
प्रतिक्रिया
