भ्रष्टाचारविरुद्ध आम नागरिकको अभियानमा एकाकार हुन शेखर कोइरालाको अपिल

काठमाडौँ- नेपाली कांग्रेसका नेता डा. शेखर कोइरालाले मानव तस्करी जस्तो घृणित कार्यमा राज्य सञ्जाल नै संलग्न भएको घटनाले विश्व समुदायसामु देशको शिर निहुरिएको भन्दै चिन्ता व्यक्त गरेका छन्।

उनले शनिबार सामाजिक सञ्जालमा भुटानी शरणार्थी प्रकरणमा भएको भ्रष्टाचारले नेपाली नै लज्जित हुनुपरेको अवस्था आएको लेखेका छन्। उनले लेखेका छन्, ‘तसर्थ राज्यको जुनसुकै तह र तप्काको जो कोहीलाई पनि कानुनको कठघरामा ल्याएर तिनलाई कडा भन्दा कडा सजाय दिनुपर्दछ।’

नेता कोइरालाले देशको शासक र प्रशासकप्रति आमनागरिकको चरम अविश्वास बढिरहेको र यसले हामीले दशकौँ संघर्ष गरेर ल्याएको लोकतन्त्र र संविधानलाई असुरक्षित पारेको बताएका छन्। कोइरालाले भनेका छन्, ‘अब समय आएको छ– भ्रष्टाचारविरुद्ध आमनागरिकसँग एकाकार गर्दै राष्ट्रिय साझा चेतना अभियानको थालनी गर्ने र नेपाललाई भ्रष्टाचारको जालोबाट उन्मुक्ति दिने।’