हिमाल प्रेस 
स्याङ्जा- स्याङ्जाको सभ्यताको रूपमा रहेको आँधीखोलाको अस्तित्व संकटमा परेको छ। श्रवणकुमारका बुबाआमाको आँसुबाट उत्पत्ति भएको मानिएको आँधीखोलाको संरक्षणका लागि अभियान नै सञ्चालन गर्नुपर्ने आवाज उठ्न थालेको छ।
यसअघि विभिन्न संघसंस्थाले आँधीखोलाको संरक्षणका लागि जनचेतनामूलक कार्यक्रम सञ्चालन गरे पनि प्रभावकारी हुन सकेका थिएनन्। पछिल्लो समय उत्खनन् कार्यले खोलाको सतह घट्दै गएको छ। सहायक खोलाहरूको मुहान सुक्दै जाँदा आँधीखोलाको अस्तित्व संकटमा पर्ने खतरा बढेको हो। बजारका ढलहरू सोझै खोलामा मिसाउँदा प्रदूषण बढ्दै गएको छ। समयमै यसको संरक्षणमा ध्यान जानुपर्नेमा आवाज उठ्न थालेको छ।
समयमै ध्यान नदिने हो भने आँधीखोलाको सभ्यता संकटमा पर्न सक्ने भएकाले सरोकारवाला पक्षसहित नागरिकलाई सचेत बनाउँदै चासो दिने बनाउनका लागि नेपाल नदी संरक्षण संस्था, नेपालले वालिङ नगरपालिकालाई ज्ञापनपत्र बुझाएको छ। संस्थाका केन्द्रीय अध्यक्ष मेघ आलेले मानव सभ्यतासँग जोडिएको, ऐतिहासिक र पौराणिक महत्त्व बोकेको आँधीखोला पछिल्लो समयमा दोहनको सिकार बन्दै गएकाले यसको रोकथाम र संरक्षणमा ध्यान दिनका लागि ‘आँधीखोला संरक्षण महाअभियान’ सञ्चालन थालिएको बताए।
‘आँधीखोलामा पहिला पानीमुनि देखिने ढुंगा अहिले धेरै माथि आइसकेका छन्, यो जथाभावी रूपमा खोलाबाट ढुंगा, गिट्टी, बालुवा उत्खनन् कार्यबाट निम्तिएको संकट हो,’ उनले भने, ‘पहिलाजस्तो ढुंगा खोलामा देखिँदैनन्, माछा पाइनै छाडे, माछा मारेरै जीवनयापन गर्ने माझी जातिको पेसा लोप भएको छ।’
आँधीखोलाको किनारमा रहेका बजारका ढलहरू सीधै मिसाउँदा खोलामा प्रदूषण बढ्दै गएकाले बेलैमा यसको नियन्त्रण र ढलको व्यवस्थापनमा ध्यान दिनुपर्ने उनले बताए। ‘स्याङ्जाको सभ्यता तथा अमूल्य गहनाको रूपमा रहेको आँधीखोलाको संरक्षण र सम्वद्र्धनमा यहीँका नीति निर्माता र नागरिक पहिला सचेत हुनुपर्छ,’ आलेले भने, ‘होइन भने केही वर्षपछि काठमाडौँको बागमती र विष्णुमतीको जस्तै हालत आँधीखोलाको हुनेमा कुनै शंका छैन, समयमै ध्यान दिनुपर्छ।’
खोलाबाट जथाभावीरुपमा ढुंगा, गिट्टी र बालुवाको दोहन रोक्नुपर्ने अवस्था छ। खोलाको मुहान तथा स्रोतको संरक्षण गर्नुपर्छ। खोला आसपास फोहोरमैला नफाल्न, बजारबाट निस्कने ढललाई प्रशोधन गरेरमात्रै मिसाउन, माझी जातीको पेसाको संरक्षण गर्दै जीविकोपार्जनमा सहयोग गर्नुपर्नेलगायत ११ बुँदे ज्ञापनपत्र वालिङ नगरपालिकालाई बुझाइएको छ।
आँधीखोला वालिङको मात्रै नभएर स्याङ्जाकै गहना र सभ्यतासँग जोडिएकाले यसको संरक्षणका लागि सबैले आ–आफ्नो ठाउँबाट लाग्नुपर्ने वालिङ नगर प्रमुख कृष्ण खाणले बताए। आँधीखोलाको संरक्षणका लागि नगरपालिका प्रतिबद्ध रहेको उल्लेख गर्दै उनले ढुंगा, गिट्टी, बालुवा जस्ता नदीजन्य पदार्थको दोहन हुन नदिन प्रयास गरिने बताए।
‘आँधीखोलाको सभ्यता जोगाउनका लागि हामी प्रतिबद्ध छौँ, सकारात्मक छौँ, यसलाई प्रदूषणरहित बनाउन कसरी सकिन्छ भन्नमा चिन्तित छौँ,’ खाणले भने, ‘बजारबाट खोलामा मिसिने ढललाई सीधै नभई प्रशोधन गरेर मिसाउनका लागि कार्य थालिएको छ, अब छिट्टै सकिन्छ।’
आँधीखोलामा माछा हराउँदै गएकाले माझी जाति आफ्नो पुख्र्यौली पेसाबाट पलायन हुँदै गएको छ। आँधीखोला गाउँपालिका, पुतलीबजार नगरपालिका, भीरकोट नगरपालिका, वालिङ नगरपालिका, गल्याङ नगरपालिका र कालीगण्डकी गाउँपालिका हुँदै आँधीखोला बग्छ। उत्पत्ति भएको अन्धाअन्धी दहदेखि आँधीमुहान (मिर्मी) पुग्दासम्म जिल्लाका मुख्यमुख्य बजार यही खोलाको किनारमा अवस्थित छन्। – तोलाकान्त बगाले/रासस
