बैतडीमा ४० जना सवार बस दुर्घटना

काठमाडौँ- बैतडीको मेलौलीमा ४० जना सवार बस दुर्घटनामा परेको छ। बैतडीको पञ्चेश्वर गाउँपालिकाको तिचोरादेखि महेन्द्रनगरका लागि छुटेको लु २ ख २०११ नम्बरको पवनदुत यातायातको बस दिउँसो करिब १ बजे मेलौली नगरपालिका-७ स्वाखानीमा दुर्घटनामा परेको हो।

जिल्ला प्रहरी कार्यालय बैतडीका प्रवक्ता योगेश खत्रीले बस सडकबाट करिब ५ सय मिटर तल खसेको जानकारी दिए। उनका अनुसार बसमा सवार ४० जनामध्ये ३९ जना घाइते भएका छन्। एक जना चालककाे अवस्था सामान्य छ।

घाइतेमध्ये १६ जनाको अवस्था गम्भीर रहेको र उनीहरूलाई उपचारका लागि डडेलधुरा अस्पताल पठाइएको प्रहरी निरिक्षक खत्रीले जानकारी दिए।

अन्य घाइतेहरूको मेलौलीस्थित केशरपुर स्वास्थ चौकीमा उपचार भइरहेको उनले बताए। बस अनियन्त्रित भएर दुर्घटनामा परेको खत्रीले हिमाल प्रेसलाई बताए।