हिमाल प्रेस 
फाइल तस्बिर
काठमाडौँ- साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा भएको आक्रमणमा १२ जनाको मृत्यु भएको छ भने ३०९ जना घाइते भएका छन्।
घटनापछि साउदी नेतृत्वको गठबन्धनले यमनका हुथी विद्रोहीविरुद्ध ‘निर्णायक’ जवाफ दिने बताएको छ।
गठबन्धनले आक्रमणका लागि इरान समर्थित हुथी समूहलाई जिम्मेवार ठहर गर्दै घटनालाई ‘युद्ध अपराध’ भनेको छ। कूटनीतिक स्रोतका अनुसार विमानस्थलमा क्षेप्यास्त्र प्रहार गरिएको थियो।
साउदी नागरिक उड्डयन प्राधिकरणका अनुसार मृतकमा चार साउदी नागरिकसहित बंगलादेश, अमेरिका, इजिप्ट, जोर्डन, सिरिया, प्यालेस्टाइन र सुडानका नागरिक छन्। घाइतेमध्ये केहीको अवस्था गम्भीर रहेको जनाइएको छ।
आक्रमणपछि विमानस्थलको सञ्चालन रोकिएको थियो। प्रत्यक्षदर्शीका अनुसार आन्तरिक उडान टर्मिनलमा क्षेप्यास्त्र प्रहार हुँदा यात्रु घाइते भएका थिए र मानिस ज्यान जोगाउन भागाभाग गरेका थिए। घाइतेमध्ये मक्का जान लागेका तीर्थयात्रीसमेत रहेको चिकित्सकले बताएका छन्।
गठबन्धनका प्रवक्ता तुर्की अल–माल्कीले सर्वसाधारण यात्रु र विमानस्थलका कर्मचारीमाथि भएको आक्रमणको निन्दा गर्दै दोषीलाई जवाफदेही बनाउने बताएका छन्।
यसअघि गठबन्धनले साउदी अरबतर्फ प्रहार गरिएका क्षेप्यास्त्र रोकिएको र प्रक्षेपणस्थल नष्ट गरिएको दाबी गरेको थियो। शनिबारको आक्रमणको जिम्मेवारी हुथीले तत्काल लिएका छैनन्।
घटनापछि रियादका विद्यालयले एक साताका लागि अनलाइन कक्षा सञ्चालन गर्ने निर्णय गरेका छन्। अमेरिका, क्यानडा, जर्मनी र स्पेनका दूतावासले पनि आफ्ना नागरिकलाई विमानस्थल नजान निर्देशन दिएका छन्।
अमेरिकी राष्ट्रपति डोनाल्ड ट्रम्पले हुथीविरुद्धको सैन्य कारबाहीमा अमेरिका सहभागी हुन सक्ने संकत गर्दै साउदी अरबमाथिको आक्रमणलाई ‘अस्वीकार्य’ बताएका छन्।
पाकिस्तानका प्रधानमन्त्री शहबाज सरिफले पनि घटनाको निन्दा गर्दै साउदी अरबको सुरक्षाप्रति आफ्नो देशको प्रतिबद्धता दोहो¥याएका छन्।
यमनमा साउदी समर्थित सरकारी फौज र हुथी विद्रोहीबीचको द्वन्द्व चर्किरहेका बेला भएको यस आक्रमणले क्षेत्रीय तनाव थप बढ्ने आशंका गरिएको छ।-रासस/एएफपी
