हिमाल प्रेस 
काठमाडौँ- नेपाल स्टक एक्सचेन्ज (नेप्से) सूचक मंगलबार लगातार चौथो कारोबार दिन पनि घट्दै १.५४ अंकले ओरालो लागेर २,७३३.५९ विन्दुमा बन्द भएको छ। यससँगै पछिल्ला चार कारोबार दिनमा नेप्से सूचकले कुल ४६.६६ अंक गुमाएको छ।
दिनभरजसो बजार दबाबमा रह्यो र २,७०० अंकको मनोवैज्ञानिक समर्थन विन्दु नजिक पुग्यो। तर, कारोबारको क्रममा सूचक २,७०२.०८ अंकको न्यूनतम विन्दुसम्म झरेपछि अन्त्यतिर केही सुधार देखिएको थियो। यद्यपि अन्तिम समयमा भएको सुधारले बजारलाई सकारात्मक क्षेत्रमा पुर्याउन सकेन।
कारोबार दिनमा १०५ कम्पनीका सेयर मूल्य बढे, १५१ घटे भने १५ वटा स्थिर रहे। नेप्से घटेपनि कुल कारोबार रकम बढेर ६ अर्ब ४४ करोड रुपैयाँ पुगेको छ जुन ६३,७३२ कारोबारमार्फत सम्पन्न भएको हो।
व्यक्तिगत कम्पनीतर्फ नयाँ सूचीबद्ध सोपान फर्मास्युटिकल्स लिमिटेड र कालिन्चोक हाइड्रोपावर लिमिटेडको सेयर १५ प्रतिशत सकारात्मक सर्किटमा पुगे।
अर्कोतर्फ क्रेस्ट माइक्रो-लाइफ फाइनान्सले ९.१६ प्रतिशतले सबैभन्दा बढी गिरावट व्यहोरेको छ। कारोबार रकमका आधारमा एग्रीकल्चर बन्ड (८ वर्ष) सबैभन्दा अगाडि रह्यो। यसको कारोबार ५७ करोड रुपैयाँ बराबर भयो।
त्यसपछि सेन्ट्रल फाइनान्स कम्पनी लिमिटेड र १०.२५ प्रतिशत, एनबीबीएल डिबेन्चर २०८५ क्रमशः ३५ करोड ९० लाख र ३१ करोड २९ लाख रुपैयाँको कारोबारसहित दोस्रो र तेस्रो स्थानमा रहे।
मंगलबार १३ मध्ये ४ समूह सूचक बढे भने बाँकी ९ समूह घटे। ‘अदर’ उपसमूह सबैभन्दा बढी ०.२९ प्रतिशतले बढ्यो भने फाइनान्स उपसमूह सबैभन्दा बढी १.०१ प्रतिशतले घट्यो।
