हिमाल प्रेस 
काठमाडौँ- अर्थमन्त्री डा. स्वर्णिम वाग्लेले मुलुकको अर्थतन्त्रको विकास र रूपान्तरणमा निजी क्षेत्रको भूमिका महत्त्वपूर्ण रहेको बताएका छन्।
सोमबार ललितपुरमा नेपाल उद्योग वाणिज्य महासंघको ६०औँ वार्षिक साधारण सभा उद्घाटन समारोहमा मन्त्री वाग्लले नेपाललाई करिब १०० अर्ब डलरको अर्थतन्त्रमा रूपान्तरण गर्ने लक्ष्यका साथ सरकार अघि बढिरहेको भन्दै यसमा निजी क्षेत्रको भूमिका महत्त्वपूर्ण रहेको बताएका हुन्।
उनले वर्तमान सरकारले निजी क्षेत्र क्षेत्रलाई उच्च प्राथमिकतामा राखेको धारणा राखे। अर्थमन्त्री वाग्लले निजी क्षेत्रमाथि धरकपड हुन्छ भन्ने अनावश्यक ढंगले संशय राख्नु नपर्ने भन्दै राजनीतिक प्रभावमा थन्क्याइएका पुराना अनुसन्धानलाई मात्रै अघि बढाइएको स्पष्ट पारे। तर व्यवसायीको आवरणमा अपराधिक गतिविधि गरेको पाइएमा कारबाही हुने उनको भनाइ छ।
उनले रास्वपाले चुनावी घोषणापत्रमा समावेश गरेका विषयलाई नै प्राथमिकतामा राखेर आगामी आर्थिक वर्षको बजेटको तयारी भइरहेको बताए। अर्थमन्त्री वाग्लले रोजगारी सिर्जनादेखि उत्पादन वृद्धि र निर्यात विस्तारसम्म निजी क्षेत्रको भूमिका अत्यन्त महत्त्वपूर्ण रहेकोले निजी क्षेत्रको संरक्षण र प्रवर्द्धन रणनीतिले निजी क्षेत्रमा देखिएका समस्या समाधान गर्ने विश्वास व्यक्त गरे।
साथै अर्थमन्त्री वाग्लेले लगानीमैत्री वातावरण, सहज नियम प्रक्रिया र स्थायित्वमा सरकारले जोड दिने प्रतिबद्धतासमेत जनाए। उनले विदेशी लगानी भित्र्याउनका लागि पनि सरकारले उचित वातावरण बनाउने धारणा राखे।
