हिमाल प्रेस 
पोखरा– पोखरामा जारी छैटौँ संस्करणको टाइगर कप राष्ट्रिय तथा अन्तर्राष्ट्रिय आमन्त्रित क्लब च्याम्पियनसिप भलिबल प्रतियोगिताको फाइनलमा न्यू डायमण्ड स्पोर्टस् क्लब र नेपाल पुलिस क्लब भिड्ने भएका छन्।
महिलातर्फ न्यू डायमण्ड क्लबले बुधबार थाइल्याण्ड क्विन्सलाई सोझो सेटमा पराजित गरेसँगै नेपाल पुलिस क्लब फाइनलमा प्रवेश गरेको हो।
पोखरा रंगशालास्थित बहुउद्देश्यीय कभर्डहलमा जारी बुधबारको दोस्रो खेलमा न्यू डायमण्डले थाइल्याण्डलाई ३–० को सोझो सेटमा पराजित गर्यो। न्यू डायमण्डले पहिलो सेट २५–२१, दोस्रो सेट २५–२३ र तेस्रो सेट २५–२० ले आफ्नो पक्षमा पारेको हो। न्यू डायमण्ड अपराजित रहँदै यसअघि नै फाइनलमा पुगिसकेको छ।
थाइल्याण्ड पराजित भएसँगै चार खेलबाट सात अंक जोडेको पुलिस फाइनलमा प्रवेश गरेको हो। थाइल्याण्डले चार खेलबाट ६ अंक प्राप्त गर्यो। अब महिलातर्फको उपाधिका लागि न्यू डायमण्ड र नेपाल पुलिस क्लब भिड्नेछन्।
तेस्रो स्थानका लागि थाइल्याण्ड क्विन्स र सशस्त्र प्रहरी बल एपीएफबीच प्रतिस्पर्धा हुनेछ। तेस्रो स्थानका लागि बिहीबार र फाइनल खेल माघ १७ गते हुनेछ। प्रतियोगितामा पुरुषतर्फ ६ र महिलातर्फ पाँच टोली सहभागी छन्। ‘सिङ्गल राउण्ड रोविन’का आधारमा खेलाइएको प्रतियोगितामा शीर्ष दुईमा रहने टोली उपाधिका लागि भिड्ने छन्।
प्रतियोगितामा महिला तथा पुरुष च्याम्पियन हुने टोलीले समान नगद ६ लाख ६६ हजार ६६६, ट्रफी र मेडल पुरस्कार प्राप्त गर्नेछन्। उपविजेताले नगद तीन लाख ६६ हजार ६६६ तथा तेस्रो हुने टोलीले नगद एक लाख ६६ हजार ६६६ प्राप्त गर्ने आयोजक टाइगर ग्रुपका सचिव डिवी नेपालीले जानकारी दिए।
प्रतियोगिताको सर्वोत्कृष्ट खेलाडीले नगद २६ हजार ६६६ प्राप्त गर्दा अन्य विधागत महिला तथा पुरुष उत्कृष्ट हुने खेलाडीले समान नगद ११ हजार ६६६ का साथमा ट्रफी र प्रमाणपत्र प्राप्त गर्नेछन्।
