हिमाल प्रेस 
काठमाडौँ- काठमाडौँ महानगरपालिका-१६ बालाजु बाइसधारास्थित सडकखण्डमा गएराति टिपरको ठक्करबाट मोटरसाइकलमा सवार एक जनाको मृत्यु भएको छ।
मृत्यु हुनेमा अर्घाखाँची घर भई हाल काठमाडौँ बसुन्धरा बस्ने अन्दाजी २१ वर्षीय सागर खड्का रहेका उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए।
उनले भने,‘बालाजुदेखि बाइपासतर्फ गइरहेको बाप्र०१–००६ख ३४५४ नम्बरको टिपर र विपरीत दिशाबाट आइरहेको लु५९प ७०६४ नम्बरको मोटरसाइकल एकापसमा ठक्कर खाँदा गम्भीर घाइते भएका खड्काको उपचारका क्रममा ट्रमा सेन्टरमा मृत्यु भएको छ।’
त्यसैगरी, उक्त दुर्घटनामा परी अर्घाखाँची घर भई हाल काठमाडौँ बालाजु हाइट बस्ने २२ वर्षीय लक्ष्मण राउत गम्भीर घाइते भएको र उनको टाउको, दाहिने हात र शरीरका विभिन्न भागमा चोट लागी बोल्न नसक्ने अवस्थामा रहेको उपत्यका ट्राफिक प्रहरी कार्यालयले जनाएको छ।
घाइतेको त्रिवि शिक्षण अस्पताल महारगञ्जमा उपचार भइरहेको तथा मृतक र घाइते दुवै जना मोटरसाइकलमा सवार रहेको खुल्नमा आएको प्रवक्ता सुवेदीले बताए।
