फागुन २१ को चुनावको विकल्प छैन : प्रचण्ड

उनले भने, ‘चुनाव तोकिएको समय फागुन २१ गते नै हुनुपर्छ। त्यसका लागि सरकारले जनाधार भएका पार्टीका नेतासँग छलफल गर्नुपर्दछ। जसको जनाधार बढी छ, उसैलाई बेवास्ता गरेर चुनावी वातावरण बनाएन भने त्यो ठीक हुँदैन।’

देशको राष्ट्रिय स्वाधीनता र सुरक्षा कमजोर बन्दै गएकाले सम्पूर्ण देशभक्त, वामपन्थी र कम्युनिस्ट शक्ति एकजुट हुनु अत्यावश्यक भएको उनले बताए। उनले अघिल्लो सरकारले दुई तिहाइ बहुमतको घमण्ड गर्दा राष्ट्रले ठूलो क्षति बेर्होनु परेको  जिकिर गरे।

‘हामीले राष्ट्र झन्डै धरापमा पुगेको देख्यौँ। सरकारमा हुँदा भ्रष्टाचारविरुद्ध लड्न खोज्यौँ। तर सरकारबाट हटाइयो। अघिल्लोपटक हामीलाई भ्रष्टाचार र राष्ट्रिय स्वाधीनताका लागि लड्न शक्ति पुगेन। आगामी निर्वाचनमा पहिलो शक्ति बनेर राष्ट्रियता र सुशासनका लागि विगतका कमीकमजोरी सच्याएर नेपाली कम्युनिस्ट पार्टीले काम गर्नेछ,’ प्रचण्डले भने।

उनले विभिन्न १७ घटकसँगको पार्टी एकता चुनाव जित्नका लागि मात्र नभएको उल्लेख गरे। ‘हामीले सुरु गरेको पार्टी एकता अभियान चुनाव जित्ने उद्देश्यका लागि मात्र होइन। राष्ट्रको रक्षा, स्वाधीनता संरक्षण तथा समृद्धिको आधार निर्माणका लागि हामीले कम्युनिस्ट एकता र लोकतान्त्रिक शक्तिसँगको सहकार्यमा जोड दिएका छौँ,’ उनले भने।

नेपाली कम्युनिस्ट पार्टीका सहसंयोजक माधवकुमार नेपालले राजनीतिक अस्थिरताको अन्त्यका लागि निर्वाचन हुनै पर्ने बताए। उनले देशको रक्षा गर्ने जिम्मेवारी नेकपाको रहेको बताए।

उनले भने, ‘राष्ट्रका सामु अहिले ठूलो संकट सिर्जना भएको छ। यसको अन्त्यका लागि निर्वाचनको विकल्प छैन। देशको रक्षाका लागिसमेत बृहत् र बलियो कम्युनिस्ट पार्टी आवश्यक छ।’

पार्टीका नेता झलनाथ खनालले नेकपालाई नेता प्रधान नभई विधि र पद्धतिमा चल्ने पार्टी बनाउनुपर्ने बताए। ‘हामीले विधि र पद्धतिलाई अनुसरण गर्ने पार्टी बनाउन चाहेका छौँ। अब विगतको जस्तो नेता प्रधान हुने पार्टी चल्दैन,’ उनले भने।

नेकपाका नेता भीम रावलले विगतका गल्तीमा माफी माग्दै सच्चिएर अघि बढ्नुपर्ने बताए।

‘विगतका कमीकमजोरीलाई आत्मसात् गर्दै सच्चिएर मात्र बलियो र  एकताबद्ध पार्टी निर्माण गर्न सकिन्छ। स्वाधीनता बलियो भएको नेपाल बनाउन सकिन्छ। त्यसका लागि पार्टीका सबै नेता तथा कार्यकर्तामा त्याग र समर्पण आवश्यक छ,’ उनले भने।

नेता नारायणकाजी श्रेष्ठले रुपान्तरित एकीकृत पार्टी आवश्यक रहेकाले सबैले आफूले आफैँलाई बदल्नुपर्ने बताए।

सभामा नेताहरू देव गुरुङ, पोखरा महानगर प्रमुख धनराज आचार्य, राजु थापा, डा‍. लक्ष्मी ओली, दीननाथ शर्मा, गायत्री गुरुङ, श्रीनाथ बराललगायतले जनताको आवश्यकता र अपेक्षा पूरा गर्ने पार्टी निर्माणको आवश्यकता औँल्याएका थिए।