हिमाल प्रेस 
काठमाडौँ- नेपाल यूएईमा जारी एसिसी यू-१९ प्रिमियर कपको फाइनलमा प्रवेश गरेको छ। उत्कृष्ट बलिङमा नेपालले सेमिफाइनलमा मलेसियालाई ९ विकेटले पराजित गर्दै फाइनल प्रवेश गरेको हो।
अजमानको सेभेन डिस्ट्रिक्ट मैदानमा टस जितेर नेपालले पहिला बलिङ रोज्यो र मलेसियालाई १७ ओभरमै ५१ रनमा अलआउट गर्दै सनसनीपूर्ण दबाब बनायो। मलेसियाले ५ विकेट गुमाउँदा मात्र ८ रन जोडेर अत्यन्तै खराब सुरुवात गर्यो।
मलेसियाका १ देखि ७ नम्बरका कुनै पनि खेलाडीले दोहोरो अंक छुन सकेनन्। टोलीको लागि सर्वाधिक रन हम्जा पांगीले १३ तथा मुहम्मद फातुलले ११ बनाए।
नेपालका नितेश कुमार पटेलले ८ ओभरमा २४ रन खर्चिँदै ४ विकेट लिए भने चन्दन रामले ५ ओभरमा १७ रनमा ३ विकेट हात पारे। अपराजित पौडेल, अशोक धामी र रोशन विश्वकर्माले एक-एक विकेट लिए।
जितका लागि ५२ रनको लक्ष्य पछ्याउँदै नेपालले ७ ओभर ५ बलमै १ विकेट मात्र गुमाएर विजय हासिल गर्यो। निरजकुमार यादव ४ रनमा आउट भएका थिए। त्यसपछि वंश क्षेत्री र निश्चल क्षेत्रीले अविजित ५१ रनको साझेदारी गर्दै सहज जित दिलाए। वंशले २३ रन र निश्चलले १५ रन बनाए।
नेपाल समूह चरण र सेमिफाइनलसहित प्रतियोगितामा अपराजित छ। अब उपाधिका लागि नेपालले यूएई र ओमानबीचको विजेतासँग सोमबार प्रतिस्पर्धा गर्नेछ।
