अपहरण मुद्दाका फरार व्यक्ति १२ वर्षपछि पक्राउ

स्याङ्जा- अपहरण तथा शरीर बन्धक मुद्दामा अदालतले सजाय तोकेर फरार रहेका एक अभियुक्तलाई १२ वर्षपछि नेपाल प्रहरीले पक्राउ गरेको छ।

जिल्ला प्रहरी कार्यालय स्याङ्जाले दिएको जानकारी अनुसार विशेष अपरेसन टोलीले अर्जुनचौपारी गाउँपालिका–५ स्याङ्जा घर भई फरार रहेका ३८ वर्षीय ठाकुर बि.क. लाई कास्कीको पोखरा, छोरेपाटनबाट सोमबार पक्राउ गरेको हो।

उच्च अदालत पोखराले २०७० साल चैत १८ गते अपहरण तथा शरीर बन्धक कसूरमा बि.क. लाई २ वर्ष ९ महिना ५ दिन कैद सजाय र रु.२५ हजार जरिवाना तोकेको थियो। फैसलापछि उनी फरार रहेका थिए।

पक्राउ परेका बि.क. लाई मंगलबार जिल्ला अदालत स्याङ्जामा पेस गरी कैद भुक्तान तथा जरिबाना असुलको प्रक्रिया अघि बढाइएको प्रहरीले जनाएको छ।

जिल्ला प्रहरी कार्यालय स्याङ्जाका सूचना अधिकारी, प्रहरी नायव उपरीक्षक प्रसन्न राज चौधरीका अनुसार अदालतको फैसला कार्यान्वयन गरी न्यायिक प्रक्रिया प्रभावकारी बनाउन प्रहरीले यस्तो अभियानलाई निरन्तरता दिइरहेको छ।