हिमाल प्रेस 
काठमाडौँ- नेपाल राष्ट्र बैंकले तोकेको दरभन्दा सस्तोमा डलर साटिदिने भन्दै एकान्तमा लगेर लुटपाट गर्ने एक युवकलाई प्रहरीले गोली प्रहार गरी नियन्त्रणमा लिएको छ।
राजधानीका विभिन्न स्थानमा डलर देखाइ लुटपाट गर्ने सिन्धुपाल्चोकको बाह्रबीसे नगरपालिका-३ का २८ वर्षीय सुनज तामाङ काठमाडौँको गोकर्णेश्वर नगरपालिका-३ गाम्चाबाट पक्राउ परेका हुन्।
उनले डलर देखाएर लुटपाट गरिरहेको भन्ने सूचनाका आधारमा जिल्ला प्रहरी परिसर काठमाडौँ र प्रहरी वृत्त बौद्धबाट खटिएको प्रहरी टोलीले घुँडामुनि गोली प्रहार गरेर नियन्त्रणमा लिएको हो।
तामाङले प्रहरीमाथि नै चक्कु प्रहार गरेपछि गोली प्रहार गरी नियन्त्रणमा लिइएको काठमाडौँका प्रहरी प्रमुख वरिष्ठ प्रहरी उपरीक्षक दिलीप घिमिरेले जानकारी दिए।
नियन्त्रणमा लिन खोज्दा जाइलागेपछि चेतावनीस्वरुप प्रहरीले पेस्तोलबाट एक राउड हवाई फायर गरेको थियो। त्यति गर्दा पनि नियन्त्रणमा नआएकाले तत्कालको परिस्थितिलाई मूल्यांकन गरी आवश्यकताअनुसार घुँडामुनि एक राउण्ड गोली प्रहार गर्नुपरेको प्रहरीले जनाएको छ। तामाङ राष्ट्रिय ट्रमा सेन्टरमा उपचार भइरहेको छ।
डलर देखाइ ठगी तथा लुटपाटका घटनामा संलग्न भएको अभियोगमा तामाङ विगतमा पनि आठ पटक पक्राउ परेका थिए। पछिल्लो समय उनले स्वयम्भू, बूढानीलकण्ठ र साँखु क्षेत्रमा सुन देखाइ रकम लुटपाट गरेको अनुसन्धानबाट खुलेको छ।
तामाङले विभिन्न स्थानमा रहेका गेष्ट हाउस, रेष्टुरेन्ट, सुन तथा गरगहना पसल, हार्डवयेर, मेडिकल, डेरी, होलसेल पसललगायतको निगरानी गरी ती स्थानको सम्पर्क नम्बर लिएर पूरानो चिनजान भएको भन्दै फोन गर्ने र सञ्चालकलाई विश्वास दिलाएर लुटपाट गर्ने गरेको पाइएको छ।
त्यस्तै सम्पर्कमा आएका व्यक्तिलाई विश्वास दिलाउन निजको समूहको अर्को व्यक्तिले ‘वाक-अशक्त’को भूमिका निर्वाह गर्ने र ठगिने व्यक्तिलाई डलर दिएर पठाउने गरेको, प्रहरीको निगरानीबाट बच्न स्थान परिवर्तन गर्दैआएको तथा सिसिटिभी नभएको क्षेत्रमा लगेर लुटपाट गर्ने गरेको अनुसन्धानका क्रममा खुलेको प्रहरीले जनाएको छ।
प्रहरीले उनको साथबाट ठगीमा प्रयोग गर्ने मोटरसाइकल तथा नक्कली नम्बर प्लेट, डलर ठगीमा प्रयोग गर्ने २० को चार बण्डल नेपाली रुपैयाँ, डलर जस्तै आकारमा काटेर राखेको सेतो कागजको बण्डल र उक्त बण्डलको तल र माथि राखिएको पाँच-पाँचको अमेरिकी डलर, एक किलो नक्कली सुनको ढिक्का बरामद गरेको आयोजित पत्रकार सम्मेलनमा जानकारी दिइयो।
पछिल्लो पटक उनले गत असोज २३ गते गोकर्णेश्वर-१२ स्थित लसुनटारमा दुई जनाको साथबाट रु आठ/आठ लाख गरी १६ लाख लुटपाट गरी फरार भएको पाइएको छ।
गैरकानुनी तबरबाट डलरलगायत विदेशी मुद्रा सटही गर्ने कार्य आपराधिक क्रियाकलाप भएको प्रहरी जनाएको छ। त्यस्तो कार्यमा संलग्न जो सुकै पनि कानुनको भागिदार हुने भन्दै प्रहरीले कम दरमा डलर साटिदिने भन्ने प्रलोभनमा नपर्न आम नागरिकमा आग्रह गरेको छ।
