शिक्षामा छोरीको पहुँच बढाउन मटिहानीको साइकल कार्यक्रम

महोत्तरी- मटिहानी नगरपालिकाले शिक्षामा छोरीको पहुँच बढाउने उद्देश्यले आर्थिक वर्ष २०७७/७८ देखि सुरु गरेको ‘साइकल कार्यक्रम’लाई यसवर्ष पनि निरन्तरता दिएको छ।

माध्यमिक शिक्षा परीक्षा (एसइई) उत्तीर्णपछि पनि छोरीहरुले उच्च शिक्षामा आकर्षित गर्ने उद्देश्यले उक्त कार्यक्रमलाई निरन्तरता दिइएको मटिहानी नगर प्रमुख हरिप्रसाद मण्डलले बताए।

कार्यक्रमअन्तर्गत नगरपालिकाले बिहीबार मटिहानी–८ स्थित श्रीराम माध्यमिक विद्यालयमा कक्षा ११ का ५८ जना छात्रालाई साइकल प्रदान गरेको हो।

‘२०७७ को शैक्षिक सत्रमा उक्त विद्यालयमा कक्षा ११ मा भर्ना हुने ३५ छात्रामात्र थिए, यो संख्या बर्सेनि बढ्दैछ, हाम्रो उद्देश्य यहाँका छोरीहरु उच्च शिक्षासम्म जोड्नु हो’, उनले भने। साइकल वितरणपछि विद्यालयमा छात्राको संख्या बढेको उनको भनाइ छ।

‘साइकलले विद्यालय आउनका लागि निकै सजिलो बनाउने छ, अब घरको काममा आमाबुबालाई सघाएर पनि समयमै विद्यालय आइपुग्ने भएका छौँ’, साइकल प्राप्त गरेपछि कक्षा ११ की छात्रा अंशु महतो भनिन्।

कक्षा ११ कि छात्रा सरस्वती कुशवाहा र अञ्जली साहले पनि साइकल वितरणले आफूहरुलाई नियमित विद्यालय आवतजावत गर्न सहज भएको प्रतिक्रिया दिए।