हिमाल प्रेस 
तस्बिर : एफपी
काठमाडौँ– इरानस्थित भारतीय दूतावासले नेपाल र श्रीलंकाका नागरिकको उद्धारका लागि पहल गर्ने जनाएको छ। नेपाल र श्रीलंका सरकारको अनुरोधमा यो प्रयास गरिने दूतावासले जनाएको हो।
‘नेपाल र श्रीलंका सरकारको अनुरोधमा इरानस्थित भारतीय दूतावासले नेपाल र श्रीलंकाका नागरिकलाई पनि उद्धार गर्नेछ,’ इरानस्थित भारतीय दूतावासले जनाएको छ।
इरान र इजरायलबीच जारी द्वन्द्वका कारण बिग्रँदो अवस्थालाई मध्यनजर गर्दै भारत सरकारले इरानबाट भारतीय नागरिकलाई उद्धार गर्न ‘अपरेसन सिन्धु’ सुरु गरेको छ।
भारतीय विदेश मन्त्रालयका प्रवक्ता रणधीर जैसवालका अनुसार ‘अपरेसन सिन्धु’ अन्तर्गत अहिलेसम्म ५१७ जना भारतीय नागरिक इरानबाट स्वदेश फर्केका छन्।
जयसवालका अनुसार इरानबाट भारतीयहरूलाई लिएर एक विशेष विमान जुन २१ मा तुर्कमेनिस्तानको अश्गाबातबाट नयाँ दिल्ली आइपुगेको थियो।
सामाजिक सञ्जाल एक्समा जयसवालले लेखेका छन्, ‘अपरेसन सिन्धु जारी छ। तुर्कमेनिस्तानको अश्गाबातबाट एक विशेष उद्धार उडान जुन २१ को बिहान ३ बजे नयाँ दिल्लीमा अवतरण गरेको थियो। हालसम्म इरानबाट ५१७ जना भारतीय नागरिक ‘अपरेशन सिन्धु’ अन्तर्गत स्वदेश फर्किएका छन्।’
इजरायल र इरानबीचको द्वन्द्व शनिबार नवौँ दिनमा प्रवेश गरेको छ। गत जुन १३ मा इजरायलले इरानी सैन्य र आणविक स्थलहरूमा ‘अपरेसन राइजिङ लायन’ नामक विशाल हवाई आक्रमण गरेपछि द्वन्द्व सुरु भएको थियो।
त्यसको जवाफमा इस्लामिक रिभोलुसनरी गार्ड कोर (आईआरजीसी) ले इजरायली लडाकु विमान इन्धन उत्पादन केन्द्र र ऊर्जा आपूर्ति केन्द्रलाई लक्षित गरी ‘अपरेसन ट्रु प्रोमिस ३’ नामक ड्रोन र क्षेप्यास्त्र आक्रमण सुरु गरेको थियो। –रासस/एएफपी
![शिक्षा विधेयक र उपसमिति प्रतिवेदनको यी विषयमा मन्त्रालयले गर्यो संशोधन [बुँदाहरूसहित]](https://himalpress.com/wp-content/uploads/2025/06/edi-bill.jpg)
