हिमाल प्रेस 
शेख हसिना : फाइल तस्बिर
काठमाडौँ– जुलाई–अगस्तमा विद्रोहको नेतृत्व गर्ने विद्यार्थी समूहको मागपछि पूर्वप्रधानमन्त्री शेख हसिनाको पार्टी अवामी लिगनिकट विद्यार्थी संगठन ‘बंगलादेश छात्र लिग’ लाई बंगलादेशको अन्तरिम सरकारले प्रतिबन्ध लगाएको छ।
सरकारले ‘आतंकवाद विरोधी ऐन, २००९’ को धारा १८ को उपधारा (१) मा प्रदान गरिएको अधिकार प्रयोग गर्दै बंगलादेश अवामी लिगको भ्रातृ संगठन बंगलादेश छात्र लिगलाई प्रतिबन्ध लगाएको बंगलादेशको गृह मन्त्रालयले जनाएको छ।
यसअघि मंगलबार पूर्वप्रधानमन्त्री शेख हसिनालाई सत्ताच्युत गर्न नेतृत्व गरेको समूह ‘एन्टी–डिस्क्रिमिनेशन स्टुडेन्ट मुभमेन्ट’ले बंगलादेशका राष्ट्रपति मोहम्मद साहाबुद्दिनको राजिनामासहित पाँच बुँदे मागको घोषणा गरेको थियो।
मागहरूमा अवामी लिगको विद्यार्थी संगठन बंगलादेश छात्र लिगमाथि प्रतिबन्ध लगाउने पनि समावेश थियो।
‘बङ्गलादेशको स्वतन्त्रतापछि विभिन्न समयमा, विशेष गरी पछिल्लो १५ वर्षको तानाशाही शासनकालमा, बंगलादेश अवामी लिगको भ्रातृ संगठन ’बङ्गलादेश छात्र लिग’ हत्या, यातना, साझा कोठामा उत्पीडन, छात्रावास, बलात्कार र यौन उत्पीडनलगायतका विभिन्न सार्वजनिक सुरक्षा सम्बन्धी गतिविधिहरूमा संलग्न रहेको छ,’ बंगलादेशको गृह मन्त्रालयले जारी गरेको आदेशमा भनिएको छ।
‘यस सम्बन्धमा दस्तावेजी जानकारी देशका सबै प्रमुख मिडियामा प्रकाशित गरिएको छ र केही आतंकवादी घटनामा संगठनका नेता एवं कार्यकर्ताहरू फौजदारी अदालतमा पनि प्रमाणित भएका छन्,’ जारी गरिएको आदेशमा भनिएको छ।
