हिमाल प्रेस 
सांकेतिक तस्बिर।
काठमाडौँ- वैदेशिक रोजगारमा पोल्याण्ड पठाइदिने भन्दै तीन लाख ठगी गरेको अभियोगमा प्रहरीले एक महिलालाई आज (सोमबार) पक्राउ गरी सार्वजनिक गरेको छ।
पक्राउ पर्नेमा काठमाडौँ टोखा नगरपालिका-३, मनकामना बस्ने ४४ वर्षीया कमला चुँडाल रहेको काठमाडौँ उपत्यका अपराध अनुसन्धान कार्यालयका सूचना अधिकारी एवं प्रहरी उपरीक्षक काजीकुमार आचार्यले जानकारी दिए ।
उनले भने, ‘पक्राउ परेकी निज चुँडालले एक जनालाई पोल्याण्ड लैजाने भन्दै रकम लिई विदेश नपठाई सम्पर्कविहीन भएको पीडितको उजुरीका आधारमा काठमाडौँ टोखा नगरपालिका-३ मनकामनाबाट पक्राउ गरिएको हो।’
उनलाई थप अनुसन्धान तथा कारबाहीको लागि आजै (सोमबार) वैदेशिक रोजगार विभाग, ताहाचल काठमाडौँ पठाइएको सूचना अधिकारी आचार्यले बताए।
प्रकाशित: २४ भदौ २०८१ १९:०३
प्रतिक्रिया
