हिमाल प्रेस 
म्याग्दी- म्याग्दीका किसान पछिल्लो समय परम्परागत बाली छोडेर आलु खेतीमा आकर्षित भएका छन्। गहुँ, जौ, उवा, फापर खेती गर्ने किसान पछिल्लो समय ती बाली छोडेर आलु खेतीमा आकर्षित भएका हुन्।
पश्चिम म्याग्दीको मालिका गाउँपालिका–१ निस्कोट, २ रुम, ६ दरवाङ,७ विम, मङ्गला गाउँपालिकाको रणबाङ, अर्मन, नेटालगायत धौलागिरि गाउँपालिकाको अधिकांश वडाका कृषक परम्परागत अन्नबाली छोडेर आलुखेतीतिर लागेका स्थानीय गाउँपालिकाका कृषि प्राविधिकको भनाइ छ।
मङ्गला गाउँपालिकाका कृषि प्राविधिक जगत बानियाँले किसानले उत्पादन गरेको आलु बजारमा सहजरुपमा बिक्री हुन थालेपछि नगदेबालीको रुपमा आलुलगायत तरकारी खेतीतर्फ किसानको आकर्षण बढेको बताए।
उच्च वातावरणमा उब्जेको जैविक आलु स्वादिलो र छिटो पाक्ने भएकाले यसको माग बढ्दै गएपछि यहाँका किसान आलुखेतीतर्फ आकिर्षत भएका मालिका-६ का वडाध्यक्ष पथबहादुर रोकाले बताए।
आलु जति फलाए पनि बिक्रीका लागि चिन्ता नभएको उनले बताए। आलु फलाएपछि मौसमीभन्दा बेमौसमीमा भाउ धेरै पाइने मालिका-२ रुमका किसान टेकबहादुर विकले बताए।
म्याग्दीमा आलु मौसमको प्रतिकिलो ६० देखि ९० रुपैयाँसम्ममा बिक्री हुन्छ भने बेमौसममा १०० देखि १४० रुपैयाँसम्ममा बिक्री गर्न सकिने किसान बताउँछन्।
आलु उत्पादक किसानका लागि भण्डारण, बजारीकरण र नयाँ प्रविधि विस्तारमा स्थानीय पालिका र कृषि ज्ञान केन्द्रले सहयोग गर्न आवश्यक रहेको यहाँका किसानको भनाइ छ। रासस
