झापामा जंगली हात्तीको आक्रमणबाट एक पुरुषको मृत्यु

इटहरी- झापामा जंगली हात्तीको आक्रमणबाट एक जनाको मृत्यु भएको छ। जंगली हात्तीको आक्रमणबाट झापाको शिवसताक्षी नगरपालिका-११ का ४६ वर्षीय मेघराज राईको मृत्यु भएको हो।

घरमै सुतिरहेको बेला गएराति १ बजे उनलाई हात्तीले आक्रमण गरेको प्रहरीको प्रारम्भिक अनुसन्धानबाट खुलेको छ। घरको आँटी भत्काएर हात्तीले राईलाई आक्रमण गरेको प्रहरीले जनाएको छ।

हात्तीको आक्रमणबाट मृत्यु भएका राईको शव पोस्टमार्टमका लागि अस्पताल लगेर आवश्यक अनुसन्धान सुरु गरिएको प्रहरीको भनाइ छ।

पछिल्ला केही महिनायता कोशी प्रदेशका सुनसरी, मोरङ र झापामा जंगली हात्तीले मानिसको ज्यानै लिएका घटना बढिरहेका छन्।