हिमाल प्रेस 
काठमाडौँ– स्थानीय बजारमा सुनचाँदीको मूल्य घट्ने क्रमले निरन्तरता पाएको छ । महिनाको पहिलो कारोबार दिन आइतबार सुनको मूल्य प्रतितोला ४ सय रुपैयाँले घटेको छ भने चाँदीको मूल्य ५० रुपैयाँले घटेको छ ।
नेपाल सुनचाँदी व्यवसायी महासंघका अनुसार आइतबार सुनको मूल्य प्रतितोला २ लाख ८९ हजार ७ सय रुपैयाँ कायम भएको छ । यसअघि गत महिनाको अन्तिम कारोबार दिन शुक्रबार सुन प्रतितोला २ लाख ९० हजार १ सय रुपैयाँमा कारोबार भएको थियो ।
त्यस्तै, चाँदीको मूल्य पनि घटेको छ । शुक्रबार प्रतितोला ४ हजार १५० रुपैयाँ रहेको चाँदीको मूल्य आइतबार घटेर ४ हजार १०० रुपैयाँ कायम भएको महासंघले जनाएको छ ।
पछिल्लो एक साताको अवधिमा पनि सुनचाँदीको मूल्यमा उल्लेख्य गिरावट आएको छ । गत साताको आइतबार सुन प्रतितोला २ लाख ९४ हजार ४ सय रुपैयाँ र चाँदी ४ हजार ४१५ रुपैयाँमा कारोबार भएको थियो । त्यसयता सुनको मूल्य प्रतितोला ४ हजार ७ सय रुपैयाँ र चाँदीको मूल्य ३१५ रुपैयाँले घटेको छ ।
यता, अन्तर्राष्ट्रिय बजारमा पनि सुनचाँदीको मूल्य घटेको छ । मेटल डेलीका अनुसार आइतबार अन्तर्राष्ट्रिय बजारमा सुनको मूल्य प्रतिऔंस ४ हजार १५४ अमेरिकी डलर कायम भएको छ भने चाँदीको मूल्य प्रतिऔंस ५७ अमेरिकी डलर रहेको छ ।
स्थानीय तथा अन्तर्राष्ट्रिय बजार दुवैमा सुनचाँदीको मूल्य घट्दा बजारमा यसको प्रभाव देखिएको छ ।
