हिमाल प्रेस 
काठमाडौँ– पछिल्लो पाँच वर्षमा विदेश जाने नेपालीसँगै आठ खर्ब ६४ अर्ब पाँच करोड ४० लाख रुपैयाँ नेपालबाट बाहिरिएको छ ।
अर्थ मन्त्रालयले हालै सार्वजनिक गरेको विवरणअनुसार उक्त रकम आर्थिक वर्ष २०७८/७९ देखि २०८२/८३ को अवधिमा बाहिरिएको हो।
यो रकम नेपालीहरू विभिन्न उदेश्यले विदेश जाँदा सँगै बाहिरिएको हो । बाहिरिने रकमको ठूलो हिस्सा विदेशमा अध्ययन गर्न जाने विद्यार्थीहरूले लैजाने गरेका छन् ।
पछिल्ला पाँच वर्षमध्ये सबैभन्दा कम रकम आर्थिक वर्ष २०७८/७९ मा ९७ अर्ब ३२ करोड ३० लाख रुपैयाँ बाहिरिएको थियो । त्यस्तै, सबैभन्दा बढी रकम आर्थिक वर्ष २०८१/८२ मा दुई खर्ब २३ अर्ब ७१ करोड ८० लाख रुपैयाँ देशबाट बाहिरिएको छ ।
अर्थको विवरणअनुसार विदेश जाने नेपालीसँगै आर्थिक वर्ष २०७८/७९ मा ९७ अर्ब ३२ करोड ३० लाख रुपैयाँ, २०७९/८० मा एक खर्ब ४४ अर्ब ४७ करोड ९० लाख रुपैयाँ बाहिरिएको छ । त्यस्तै, २०८०/८१ मा एक खर्ब ८९ अर्ब ४३ करोड ४० लाख रुपैयाँ, २०८१/८२ मा दुई खर्ब २३ अर्ब ७१ करोड ८० लाख रुपैयाँ र २०८२/८३ मा दुई खर्ब ९ अर्ब १० करोड रुपैयाँ बाहिरिएको छ ।
