हिमाल प्रेस 
काठमाडौँ- नेपाली कांग्रेसको सभापतिमा गगनकुमार थापा निर्वाचित भएका छन्। १५औँ महाधिवेशनअन्तर्गत भएको शुक्रबार भएको निर्वाचनमा थापा ६ हजार पाँच सय ८४ मत प्राप्त गर्दै सभापतिमा निर्वाचित भएको केन्द्रीय निर्वाचन समितिका संयोजक प्रेमबहादुर खड्काले जानकारी दिए।
सभापति पदका अर्का उम्मेदवार श्यामकृष्ण खड्गीले तीन सय ७५ मत प्राप्त गरेका छन्। कुल सात हजार १३ मत खसेको निर्वाचनमा ५४ मत बदर भएको छ।
कुल खसेको मतका आधारमा थापाले ९३.८८ प्रतिशत मत प्राप्त गरेका छन्। खड्गीले ५.३५ प्रतिशत मत पाउँदा ०.७७ प्रतिशत मत बदर भएको छ। थापाले खड्गीभन्दा ६ हजार दुई सय नौ मत बढी प्राप्त गरेका छन्।
यसअघि कांग्रेसको १४औँ महाधिवेशनबाट महामन्त्री निर्वाचित थापा पार्टीभित्र नेतृत्व परिवर्तन र संगठनात्मक सुधारको अभियानमा सक्रिय थिए। तत्कालीन महामन्त्री थापासहितका नेताहरूको पहलमा भएको विशेष महाधिवेशनले उनलाई सभापतिमा चयन गरेको थियो।
विशेष महाधिवेशनबाट नेतृत्व परिवर्तन भएपछि कांग्रेसभित्र पार्टीको वैधानिकता, संगठनात्मक संरचना र नेतृत्वको विषयमा बहस भएको थियो। त्यसपछि भएको १५औँ महाधिवेशनबाट थापा सभापतिमा निर्वाचित भएका हुन्।
