सुस्ता गाउँमा पस्यो नारायणी, २५ जनालाई होल्डिङ सेन्टरमा सारियो

काठमाडौँ- पश्चिम नवलपरासी, सुस्ता गाउँ पालिका–५ सुस्ताबाट २५ जनालाई प्रहरीले उद्धार गरेको छ। नारायणी नदीमा बहाव बढेर थारुटोलामा बाढी पसेकाले सशस्त्र प्रहरी बल नेपाल बीओपी सुस्ताले डुबानमा परेका २५ जना स्थानीयलाई उद्धार गरेको हो।

पशु चौपायहरूको पनि उद्धार गरी सोही ठाउँमा रहेको होल्डिङ सेन्टरमा स्थानान्तरण गरिएको प्रहरीले बताएको छ ।

जिल्लाको सुस्ता गाउँपालिका–५ सुस्तास्थित थारु टोलका घरपरिवार बाढी पसेपछि सुस्तामै रहेको सामुदायिक भवन तथा आफन्तकहाँ आश्रय लिएका छन् । प्रमुख जिल्ला अधिकारी दीपकराज नेपालका अनुसार सुस्ताको थारु टोलमा केही घरमा बाढी पसेपछि त्यहाँका स्थानीयलाई सुरक्षित स्थानमा गएर बस्न आग्रह गरिएको छ । केही आफन्तको घरमा गएर बसेका छन् ।

सुस्ता बचाउ अभियानका प्रवक्ता रवीन्द्र जैसवालका अनुसार थारु टोलमा रहेको ७८ घरपरिवारलाई सुस्ताको आश्रयस्थल र आफन्तका घरमा सारिएको छ। नारायणी नदीको बाढी थारु टोलमा प्रवेश गरेपछि नेपाल प्रहरीलगायत उद्धारका लागि खटिएका सुरक्षाकर्मी सहयोगमा सूचना प्रवाह गर्दै स्थानीयलाई सुरक्षित स्थानमा सारिएको छ ।

सुस्ता कै स्थानीय मुन्सीकुमार हरिजनका अनुसार लगातारको वर्षाले सुस्ताको थारु टोलमा रहेको केही घर डुबानमा परेको छ । नारायणी नदीको बाढी सिधै सुस्ताको थारु टोलमा प्रवेश गरी घर, खेतबारी तथा बाटो डुबान गराएको बताए ।

उनले भने, ‘मैलै लगाएको १० कठ्ठामा उखु खेती पनि नारायणीको बाढीले बगाएको छ । म जस्तै दर्जनौँ किसानको धान र उखुलगायतको बाली बगाएको छ ।’ सुस्तास्थित नारायणी नदीले वर्षा मौसम सुरु भए लगतै अस्थायी बाँध कटान गर्दै सुस्ताको धेरै भूमि कटान गरिसकेको छ ।